ជាដំណឹងដ៏សោកសៅមួយ ដោយ Lee Yoo Joo គ្រូបង្ហាត់យូហ្គាដ៏ល្បីឈ្មោះម្នាក់ប្រចាំប្រទេសកូរ៉េខាងត្បូង បានទទួលមរណភាពភ្លាមៗកាលពីថ្ងៃទី ១៨ ខែកុម្ភៈ ឆ្នាំ ២០២៥ កន្លងទៅក្នុងវ័យត្រឹម ៣៥ ឆ្នាំ។ ដំណឹងនៃការចាកចេញទៅភ្លាមៗនៃគ្រូបង្ហាត់យូហ្គាដ៏ល្បីរូបនេះត្រូវបានប្រកាសដោយគណនី Instagram របស់កន្លែងបង្ហាត់យូហ្គារបស់នាងផ្ទាល់ដែលមានឈ្មោះថា Yogaum កាលពីថ្ងៃទី ១៩ ខែកុម្ភៈ។
តាមរយៈសារបង្ហោះបានរៀបរាប់ថា៖ «ពួកយើងមានដំណឹងដ៏សោកសៅភ្លាមៗចែករំលែកប្រាប់អ្នកទាំងអស់គ្នា។ អ្នកគ្រូ Lee Yoo Joo បានលាចាកលោកទៅហើយកាលពីម្សិលមិញនេះ។ តាមការសំណូមពររបស់ក្រុមគ្រួសាររបស់អ្នកគ្រូ គឺនឹងមិនមានការធ្វើពិធីគោរពវិញ្ញាណក្ខន្ធ ឬពិធីបុណ្យសពដាច់ដោយឡែកនោះឡើយ។ ពួកយើងនឹងរៀបចំកន្លែងមួយនៅស្ទូឌីយោហាត់យូហ្គារបស់អ្នកគ្រូ Lee Yoo Joo ដើម្បីឱ្យអ្នកទាំងអស់គ្នាធ្វើការលាគ្នាចុងក្រោយរហូតដល់ថ្ងៃសុក្រខាងមុខនេះ»។
គួរឱ្យដឹងផងដែរថា កាលពីថ្ងៃទី ១៨ ខែកុម្ភៈ ឆ្នាំ ២០២៥ កន្លងទៅដែលជាថ្ងៃដែល Lee Yoo Joo លាចាកលោកទៅនោះ រូបនាងបានធ្វើការបង្ហោះរូបភាពរបស់ខ្លួនចំនួន ២ សន្លឹកលើ Instagram អមដោយ caption មួយម៉ាត់យ៉ាងខ្លីថា៖ «Bye»។ បច្ចុប្បន្ន ក្រោមការបង្ហោះមួយនេះ មិត្តភក្តិ ក្រុមគ្រួសារ ក៏ដូចជាអ្នកតាមដាននាងទាំងអស់បាននាំគ្នាចូលទៅខមមិនរំលែកទុក្ខ និង លាគ្នាជាមួយនាងជាលើកចុងក្រោយគ្រប់ៗគ្នា។
គួររំឭកថា អ្នកគ្រូ Lee Yoo Joo បានផ្ទុះប្រជាប្រិយភាពខ្លាំងក្រោយរូបនាងបង្ហាញខ្លួនក្នុងកម្មវិធីកម្សាន្ត «Infinite Challenge» របស់ទូរទស្សន៍ MBC ដោយពេលនោះនាងបានធ្វើការបង្ហាត់បង្រៀនយូហ្គាដល់អ្នកចូលរួមកម្មវិធីរួមមាន Yoo Jae Suk, Park Myung Soo និង Haha៕
