ប្រទេសកូរ៉េខាងត្បូង បច្ចុប្បន្នកំពុងតែជួបបញ្ហាខ្លាំងក្នុងការទប់ស្កាត់ភ្លើងឆេះព្រៃដ៏ខ្លាំងក្លានៅខេត្តភាគខាងកើតប្រទេសដែលបានដុតបំផ្លិចបំផ្លាញសំណង់អគារជាច្រើន ដោយក្នុងនោះរួមមានទាំងព្រះវិហារបុរាណ Gounsa ដែលមានអាយុកាល ១ ពាន់ឆ្នាំផងដែរ។
ព្រះវិហារបុរាណ Gounsa អាយុកាលជាង ១ ពាន់ឆ្នាំនេះដែរ មានទីតាំងនៅតំបន់ Uiseong ត្រូវបានភ្លើងលេបត្របាក់ខ្ទេចគ្មានសល់ នេះបើតាមមន្ត្រីព្រៃឈើក្នុងតំបន់ក៏ដូចជាសាក្សីបានបញ្ជាក់។ មន្ត្រីព្រៃឈើដដែលបានឱ្យដឹងទៀតថា កងកម្លាំងពន្លត់អគ្គិភ័យ រួមទាំងព្រះសង្ឃនៅព្រះវិហារ Gounsa ត្រូវបានជម្លៀសចេញនៅវេលាម៉ោង ៣ និង ២០ នាទីរសៀល (ពេលវេលាក្នុងតំបន់) ពេលដែលភ្លើងឆាបឆេះឡើង ហើយប្រមាណជា ១ ម៉ោងកន្លះក្រោយមក ខាងឧទ្ធម្ភាគចក្រពន្លត់ភ្លើងបានប្រកាសថា ភ្លើងឆេះនៅព្រះវិហារបានរលត់ហើយតែសំណង់អគារព្រះវិហារត្រូវបានឆេះខ្ទេចអស់ទាំងស្រុង។
រដ្ឋមន្ត្រីទីស្ដីការក្រសួងមហាផ្ទៃ និង សុខសុវត្ថិភាពប្រចាំប្រទេសកូរ៉េខាងត្បូង Ko Ki-dong បានប្រកាសកាលពីថ្ងៃទី ២៥ ខែមីនា ឆ្នាំ ២០២៥ កន្លងទៅថា គិតមកទល់ពេលនេះភ្លើងឆេះព្រៃបានបំផ្លាញផ្ទៃដីប្រមាណជា ១៤ ៦៩៤ ហិកតា ហើយការខូចខាតគឺនៅតែបន្តកើនឡើងទៀត។
គួរឱ្យដឹងថា តាំងពីថ្ងៃទី ២២ ខែមីនា ឆ្នាំ ២០២៥ មក ភ្លើងឆេះព្រៃជាច្រើនបានឆាបឆេះឡើងនៅភាគអាគ្នេយ៍ប្រទេសកូរ៉េខាងត្បូង និង ថែមទាំងបានឆក់យកអាយុជីវិតមនុស្ស ៤ នាក់ទៀតផង។ ក្រុមពន្លត់អគ្គិភ័យជាង ៦៧០០ នាក់បានចុះប្រតិបត្តិការពន្លត់ភ្លើង ដោយក្នុងនោះ ២ ភាគ ៥ នៃអ្នកពន្លត់អគ្គិភ័យទាំងនោះត្រូវបានបញ្ជូនទៅតំបន់ Uiseong នាខេត្ត North Gyeongsang ដែលជាទីតាំងមានភ្លើងឆេះរាលដាលខ្លាំងបំផុត៕
