កាលពីវេលាម៉ោង ៨ យប់ថ្ងៃទី ២៦ ខែមេសា ឆ្នាំ ២០២៥ (ពេលវេលាក្នុងតំបន់) មានហេតុការណ៍ដ៏រន្ធត់មួយបានកើតមានឡើងនៅក្រុង Vancouver ប្រទេសកាណាដា ដោយមានរថយន្តមួយគ្រឿងបានបុករះលើហ្វូងមនុស្សដែលកំពុងចូលរួមសប្បាយកម្មវិធីបុណ្យសហគមន៍របស់ជនជាតិហ្វីលីពីន បណ្ដាលឱ្យមនុស្សជាច្រើននាក់បានស្លាប់ និង រងរបួស។
តាមការបញ្ជាក់ពីខាងប៉ូលិសនៅក្រុង Vancouver បានបញ្ជាក់ថា យ៉ាងហោចណាស់មានមនុស្ស ១១ នាក់បានស្លាប់ និង ជាច្រើននាក់ផ្សេងទៀតបានរងរបួសក្នុងហេតុការណ៍ដ៏រន្ធត់មួយនេះ។ ជនបង្កត្រូវបានចាប់ខ្លួនបានភ្លាមៗផងដែរ ប៉ុន្តែខាងប៉ូលិសនៅមិនទាន់បញ្ជាក់ពីគោលបំណងដែលជនបង្ករូបនោះបុករះចូលហ្វូងមនុស្សនោះឡើយ។
តាមសាក្សីនៅកន្លែងកើតហេតុថ្លែងប្រាប់សារព័ត៌មាន CTV News បាននិយាយថា រូបលោកបានឃើញឡានពណ៌ខ្មៅមួយគ្រឿងបើកបរក្នុងល្បឿនលឿនបុកចូលបរិវេណនៃកន្លែងធ្វើកម្មវិធីមុនពេលបុករះទៅលើហ្វូងមនុស្សដែលកំពុងដើរកម្សាន្តនៅទីនោះ។ របាយការណ៍ពីព័ត៌មាន Vancouver Sun បានឱ្យដឹងថា អំឡុងពេលកើតហេតុនោះមានមនុស្សរាប់ពាន់នាក់កំពុងដើរលេងនៅទីនោះ។
គួរឱ្យដឹងថា ពិធីបុណ្យខាងលើគឺមានឈ្មោះថា «Lapu Lapu Day» ដែលជាពិធីបុណ្យដាក់ឈ្មោះថាមេទ័ពជនជាតិដើមភាគតិចរបស់ហ្វីលីពីនម្នាក់ដែលបានប្រយុទ្ធជាមួយនឹងប្រទេសអេស្ប៉ាញក្នុងសតវត្សរ៍ទី ១៦។ កម្មវិធីបុណ្យចាប់ផ្ដើមធ្វើឡើងនៅថ្ងៃទី ២៥ ខែមេសា ដោយនេះជាលើកទី ២ ហើយដែលពិធីបុណ្យនេះរៀបចំធ្វើឡើងនៅក្រុង Vancouver ប្រទេសកាណាដានោះ៕
ប្រភព៖ VN Express
