ភ្លើងឆេះព្រៃដ៏ធំបំផុតមិនធ្លាប់មានតាំងពីឆ្នាំ ១៩៩២ បានវាយប្រហារលេបត្របាក់ផ្ទៃដីជាង ១៨០០ ហិកតា នៅក្រុង Ofunato ប្រទេសជប៉ុន រហូតអាជ្ញាធរត្រូវបង្ខំចិត្តធ្វើការជម្លៀសពលរដ្ឋ ៣ ពាន់នាក់ទៅកាន់កន្លែងមានសុវត្ថិភាពភ្លាមៗ។
អគ្គិភ័យនេះដែរចាប់ផ្ដើមឆេះដំបូងក្នុងទ្រង់ទ្រាយតូចក្នុងព្រៃមួយកន្លែងជិតក្រុង Ofunato ខេត្ត Iwate ភាគខាងជើងប្រទេសជប៉ុន កាលពីថ្ងៃទី ២៦ ខែកុម្ភៈ ឆ្នាំ ២០២៥ កន្លងទៅ។ យ៉ាងណាមិញ ភ្លើងក៏បន្តរាលដាលឆេះថែមរហូតក្លាយជាទ្រង់ទ្រាយធំដល់ផ្ទៃដី ១៨០០ ហិកតា ក្នុងរយៈពេល ៤ ថ្ងៃ បើទោះជាខាងអាជ្ញាធរបញ្ជូនកងកម្លាំងពន្លត់អគ្គិភ័យដល់ ១៧០០ នាក់ដើម្បីពន្លត់ភ្លើងនោះក៏ដោយ។
តាមការលើកឡើងពីអ្នកនាំពាក្យរបស់ភ្នាក់ងារគ្រប់គ្រងគ្រោះមហន្តរាយ និង អគ្គិភ័យប្រចាំខេត្ត Iwate បានបញ្ជាក់ថា៖ «ពួកយើងកំពុងពិនិត្យលើទំហំនៃការបំផ្លិចបំផ្លាញ ប៉ុន្តែនេះគឺពិតជាគ្រោះភ្លើងឆេះព្រៃដ៏ធំបំផុតមិនធ្លាប់មានគិតតាំងពីឆ្នាំ ១៩៩២ នៃភ្លើងឆេះព្រៃនៅក្រុង Kushiro កោះ Hokkaido មក»។
ភ្លើងឆេះព្រៃនេះដែរ បានសម្លាប់មនុស្សយ៉ាងហោចណាស់ម្នាក់ និង បំផ្លិចបំផ្លាញផ្ទះសម្បែងពលរដ្ឋជាង ៨០ ខ្នង។ មនុស្សប្រមាណ ២ ពាន់នាក់ក្នុងតំបន់ក្បែរក្រុង Ofunato ត្រូវជម្លៀសឱ្យទៅស្នាក់នៅបណ្ដោះអាសន្នជាមួយមិត្តភក្តិ ឬ សាច់ញាតិពួកគេកាលពីថ្ងៃទី ០២ ខែមីនា ឆ្នាំ ២០២៥ កន្លងទៅ ខណៈជាង ១២០០នាក់ផ្សេងទៀតត្រូវបានជម្លៀសទៅជំរំស្នាក់នៅបណ្ដោះអាសន្ន៕
