ស្របពេលការប៉ះទង្គិចគ្នារវាងកម្ពុជា និង ថៃ នៅតែក្ដៅគគុក ដោយចោរឈ្លានពានថៃនៅតែបន្តវាយប្រហារមកលើកងទ័ពប្រទេសកម្ពុជា បងប្អូនប្រជាពលរដ្ឋដែលនៅសមរភូមិខាងក្រោយក៏បានរួមរួមគ្នាខ្នះខ្នែងជួយជាកម្លាំងចិត្ត ក៏ដូចជាជំនួយសប្បុរសធម៌នានា ដើម្បីគាំទ្រដល់វីរជនដ៏អង់អាចក្លាហានរបស់ខ្មែរទាំងអស់ដែលកំពុងតែពលីឈាមស្រស់ការពារបូរណភាពទឹកដីសុវណ្ណភូមិកម្ពុជា។
ជាក់ស្ដែង កាលពីថ្ងៃទី ២៤ ខែកក្កដា ឆ្នាំ ២០២៥ កន្លងទៅនេះ លោកជំទាវបណ្ឌិត ពេជ ច័ន្ទមុនី ស្ត្រីទី ១ របស់ប្រទេសកម្ពុជា បានប្រើប្រាស់បណ្ដាញសង្គមផ្ទាល់ខ្លួនប្រកាសដំណឹងដល់សាធារណជនកម្ពុជាទាំងអស់ពីយុទ្ធនាការបរិច្ចាគឈាមដើម្បីទុកសម្រាប់ត្រៀមនៅពេលបន្ទាន់ណាមួយ ដោយទីតាំងបរិច្ចាគគឺប្រព្រឹត្តទៅនៅឯកោះពេជ្រ។
តាមសេចក្ដីប្រកាសរបស់លោកជំទាវបណ្ឌិត ពេជ ច័ន្ទមុនី បានរៀបរាប់ថា ៖ «ក្នុងបុព្វហេតុមនុស្សធម៌ និង ទឹកចិត្តស្នេហាជាតិមាតុភូមិ រួមទាំងការគាំទ្រដល់យុទ្ធជនកម្ពុជាដែលកំពុងការពារបូរណភាពទឹកដី, សូមបងប្អូនប្រជាពលរដ្ឋមេត្តាចូលរួមបរិច្ចាគឈាមឱ្យបានច្រើនគ្នាដើម្បីត្រៀមនៅពេលបន្ទាន់ណាមួយ ដែលគ្រោងនឹងប្រព្រឹត្តទៅចាប់ពីថ្ងៃទី ២៥ ខែកក្កដា ឆ្នាំ២០២៥ វេលាម៉ោង ០៩.០០ ព្រឹក រហូតដល់ម៉ោង ១៧.០០ ល្ងាច នៅកោះពេជ្រ អគារ JKL។ សូមអរគុណ»៕
