កាលពីយប់ថ្ងៃទី ១៦ ខែកញ្ញា ឆ្នាំ ២០២៥ កន្លងទៅ ខាង Studio របស់តារាប្រុស Yu Menglong បានចេញលិខិតថ្លែងការណ៍មួយជំនួសម្ដាយរបស់តារាប្រុសរូបនេះ ដោយបកស្រាយបញ្ជាក់គ្រប់យ៉ាងបញ្ចប់ឱ្យអស់ការសង្ស័យជុំវិញមូលហេតុស្លាប់ភ្លាមៗរបស់លោក។
តាមសេចក្ដីប្រកាសនោះ ម្ដាយរបស់ Yu Menglong បានបញ្ជាក់ថា កូនប្រុសរបស់អ្នកស្រីបានធ្លាក់ពីលើអគារខ្ពស់ដោយសារផឹកគ្រឿងស្រវឹង។ ព័ត៌មានទទួលបានគេគឺបានឆ្លងកាត់ការស៊ើបអង្កេតរបស់អាជ្ញាធរ ហើយក្រុមគ្រួសារក៏ទទួលយកលទ្ធផលនៃការស៊ើបអង្កេតនេះដែរ និង បានរៀបចំពិធីបុណ្យសពឱ្យ Yu Menglong ចប់សព្វគ្រប់រួចរាល់ដូចគ្នា។
បន្ថែមពីនេះ ម្ដាយរបស់ Yu Menglong បានរៀបរាប់ទៀតថា៖ «ខ្ញុំសង្ឃឹមថាគ្រប់គ្នាមើលលើហេតុការណ៍គ្រោះថ្នាក់ដែលមិនរំពឹងទុកនេះដោយសមហេតុផល និង បញ្ឈប់ការប៉ាន់ស្មានទៀត។ ខ្ញុំក៏សង្ឃឹមថានឹងអាចវិលត្រឡប់មកកាន់ជីវិតដ៏សុខសាន្តវិញឆាប់ៗនេះ និង ព្យាយាមរស់នៅជីវិតមួយដ៏ល្អរាល់ថ្ងៃ។ ខ្ញុំជឿថានេះក៏ជាអ្វីដែល Menglong ចង់បានដែរ។ ជាចុងក្រោយ ខ្ញុំសង្ឃឹមថា Menglong បានទៅកាន់សុគតិភព។ ជាថ្មីម្ដងទៀត អរគុណគ្រប់គ្នាដែលបារម្ភ និង ជួយដល់ពួកយើង»៕
ប្រភព៖ Kenh14
