ថ្មីៗនេះ សារព័ត៌មាន China Press បានចេញផ្សាយករណីឃាតកម្មដ៏រន្ធត់មួយដែលបានកើតមានឡើងនៅតំបន់ Sr Mutiara Garden នារដ្ឋ Malacca ប្រទេសម៉ាឡេស៊ី ដោយជនរងគ្រោះជាតារាចម្រៀងច្រៀងតាម lounge ជនជាតិចិនម្នាក់ វ័យ ៥២ ឆ្នាំ ដោយសាកសពរបស់នាងត្រូវបានប្រទះឃើញកាលពីថ្ងៃទី ២៣ ខែកុម្ភៈ ឆ្នាំ ២០២៥ កន្លងទៅក្នុងផ្ទះជួលមួយដែលនាងស្នាក់នៅជាមួយសង្សារ។
តាមព័ត៌មានបានឱ្យដឹងថា តារាចម្រៀងស្រីខាងលើបានប្រកបអាជីពមួយនេះនៅ Malacca ច្រើនឆ្នាំមកហើយ ហើយបើទោះជានាងរៀបការមានកូនរួចហើយក្ដី ប៉ុន្តែបើតាមអ្នកស្គាល់គ្នាជាមួយនាងបានទម្លាយថាប្រមាណជាកន្លះឆ្នាំមុន នាងបានចាប់ផ្ដើមជួលផ្ទះមួយរស់នៅជាមួយគូស្នេហ៍របស់នាង។
តាមការបញ្ជាក់ពីមិត្តភក្តិជនរងគ្រោះបានបញ្ជាក់ថា ជាធម្មតានាងចាកចេញពីផ្ទះទៅច្រៀងនៅម៉ោង ៨ យប់ ហើយនាងក៏មិនដែលធ្លាប់លើកឡើងពីរឿងពាក់ព័ន្ធនឹងបញ្ហាលុយកាក់ ឬផ្លូវចិត្តអ្វីនោះឡើយ។ សូម្បីតែរឿងពិបាករកលុយអីក៏នាងមិនដែលនិយាយដែរ និង នាងថែមទាំងអាចទិញឡានថ្មីឱ្យកូនៗនាងទៀតផង តែយ៉ាងណាពាក់ព័ន្ធនឹងសង្សារនាង មិត្តភក្តិគឺមិនមាននរណាដឹងច្រើននោះឡើយ។
អាផាតមិនដែលជាកន្លែងកើតហេតុនោះបែងចែកចេញជា ៤ បន្ទប់ ដោយជនរងគ្រោះ និង សង្សារជួលមួយបន្ទប់ ខណៈ ៣ បន្ទប់ផ្សេងទៀតមានអ្នកផ្សេងអ្នកជួល។ នៅយប់ថ្ងៃទី ២១ ខែកុម្ភៈ ឆ្នាំ ២០២៥ ចាប់ពីម៉ោង ១១ យប់ដល់ ២ ភ្លឺ មានអ្នកជួលបន្ទប់ក្បែរខាងម្នាក់បានឮសំឡេងឈ្លោះគ្នា ហើយក៏ឮសម្រែកស្រែកឱ្យជួយចេញពីបន្ទប់គូស្នេហ៍ខាងលើ តែក្រោយមកសំឡេងក៏ស្ងាត់បាត់ទៅវិញ។
មកដល់ព្រឹកថ្ងៃទី ២៣ ខែកុម្ភៈ ចាប់ពីម៉ោង ១០ ដល់ម៉ោង ១២ អ្នកជួលផ្ទះក្បែរខាងសង្ស័យក៏បានដើរទៅពិនិត្យហើយគោះទ្វារសួរ តែសង្សារជនរងគ្រោះបាននិយាយតបពីក្នុងមកថា ពួកគេគ្រាន់ទាស់ទែងគ្នាធម្មតាទេ។ យ៉ាងណាមិញ អ្នកជួលផ្ទះរូបនោះនៅតែសង្ស័យដូច្នេះរូបគាត់ក៏នៅតែបន្តគោះទ្វារដោយយកលេសថាយកអាហារឱ្យជនរងគ្រោះ ហើយពេលគេចូលទៅដល់ក្នុងបន្ទប់ទើបស្លុតចិត្តពេលឃើញជនរងគ្រោះដេកនឹងធ្មឹងលើគ្រែ ទើបគេទាក់ទងទៅមិត្តភក្តិភ្លាមៗឱ្យជួយខលហៅប៉ូលិស។
ប៉ូលិសបានចុះមកដល់ទីតាំងកើតហេតុ ហើយបញ្ជាក់ថានារីរងគ្រោះបានស្លាប់ជាង ១ ថ្ងៃទៅហើយ ដោយជនបង្កនៅជាមួយសាកសពរហូត។ ពេលប៉ូលិសទៅដល់ឃាត់ខ្លួន រូបគេក៏នៅក្នុងបន្ទប់ជាមួយគ្នានោះដែរទាំងរាងកាយរបស់គេមានស្នាមចាក់ដោយកាំបិតជាច្រើនកន្លែង និង ត្រូវបញ្ជូនទៅព្យាបាលនៅមន្ទីរពេទ្យសិន។ ចំណែកទីតាំងកើតហេតុវិញ ប៉ូលិសរកឃើញកាំបិតតូចៗចំនួន ២ ដោយសង្ស័យជាអាវុធសម្លាប់ជនរងគ្រោះ។
ក្រោយហេតុការណ៍ ខាងក្រុមគ្រួសារជនរងគ្រោះបានទៅដល់ទីតាំងភ្លាមៗដែរ ប៉ុន្តែដោយសារតែប៉ូលិសកំពុងធ្វើការស៊ើបអង្កេត ពួកគេមិនអាចចូលទៅក្នុងអាផាតមិនបានឡើយ ដោយរង់ចាំព័ត៌មានពីប៉ូលិសនៅខាងក្រៅ៕
ប្រភព៖ Kenh14
