ក្រុមហ៊ុនចិញ្ចឹម និង លក់មាន់ទានៅក្រុង Houston សហរដ្ឋអាមេរិក កំពុងតែដាច់ខ្លាំងក្នុងការលក់មេមាន់ ខណៈពលរដ្ឋអាមេរិកជាច្រើននាំគ្នាសម្រុកទិញយកទៅចិញ្ចឹមនៅផ្ទះដើម្បីយកពង ព្រោះតែពងមាន់ឥលូវកំពុងខើចទៅៗឯតម្លៃក៏ឡើងខ្លាំងទៅៗខុសធម្មតា។
ថ្លែងប្រាប់សារព័ត៌មាន លោក John Berry អ្នកគ្រប់គ្រងក្រុមហ៊ុនចិញ្ចឹមសត្វគោក្របីមាន់ទានៅ Houston រដ្ឋ Texas បានឱ្យដឹងថា តម្រូវការសត្វមាន់គឺកើនឡើងខ្លាំងគួរឱ្យកត់សម្គាល់ ព្រោះតែអតិថិជនកំពុងប្រឈមខ្លាំងនឹងការឡើងថ្លៃពងមាន់ និង ចំនួនកាន់តែខើចទៅ។ ការឡើងថ្លៃពងមាន់នេះដែរ គឺកើនឡើងដោយសារតែការផ្ទុះឆ្លងជំងឺផ្ដាសាយបក្សីតាំងពីដើមឆ្នាំ ២០២៤ មកម្ល៉េះ ដែលជាហេតុធ្វើឱ្យមាន់ក្នុងកសិដ្ឋានជាច្រើនត្រូវបំផ្លាញក្នុងទ្រង់ទ្រាយធំ។
តាមការបញ្ជាក់ពីក្រសួងកសិកម្មនៅអាមេរិកបានឱ្យដឹងថា ដោយសារតែជំងឺផ្ដាសាយបក្សី កសិដ្ឋានទូទាំងប្រទេសត្រូវអស់មេមាន់ជាង ២១ លានក្បាលគិតតាំងពីដើមឆ្នាំនេះ ក្រោយមាន់ ១៣.២ លានក្បាលត្រូវបានសម្លាប់ចោលក្នុងខែធ្នូ ឆ្នាំ ២០២៤។ ស្ថានការណ៍បែបនេះហើយបានធ្វើឱ្យពងមាន់មិនសូវមានដាក់លក់នៅទីផ្សារក្នុងតំបន់ជាច្រើន នាំឱ្យតម្លៃក៏ហក់ឡើងថ្លៃរហូតដល់ ១៦០% បើធៀបទៅនឹងឆ្នាំ ២០១៩។ ជាងនេះទៅទៀត តាមផ្សារទំនើបខ្លះក៏បានកំណត់ចំនួនពងដែលអតិថិជនទិញប្រចាំថ្ងៃទៀតផង។
លោក John Berry បានរៀបរាប់ថា៖ «មេមាន់ក្នុងកសិដ្ឋានរបស់យើងបានលក់ចេញគុណនឹងពីរ ហើយយើងរំពឹងថានឹងកើនដល់គុណនឹងបីទៀត ដោយឥលូវពួកយើងលក់បានជាង ១០០ ក្បាលក្នុងមួយសប្ដាហ៍។ ក្នុងអំឡុងពេលពងមាន់កំពុងត្រូវប៉ាន់ខ្លាំងនេះ ត្រឹមពេលពី ២ ទៅ ៣ សប្ដាហ៍គឺយើងលក់មេមាន់អស់ហើយ»។ លោក Berry បានបន្ថែមឱ្យដឹងទៀតថា ភាគច្រើននៃអ្នកដែលមកទិញមេមាន់កន្លែងលោក គឺជាអ្នកទិញមាន់យកទៅចិញ្ចឹមលើកដំបូង។
ងាកមកពលរដ្ឋជាអ្នកទិញម្នាក់វិញ ឈ្មោះថា Arturo Becerra លោកបានទិញមេមាន់ចំនួន ១០ ក្បាលក្នុងតម្លៃ ៤០០ដុល្លារ និង ថែម ២០ ដុល្លារទៀតជារៀងរាល់ខែលើការចំណាយថ្លៃចំណីរបស់ពួកវា។ កាលពីដើមសប្ដាហ៍នេះ លោកបានទិញមេមាន់ថែម ៥ ក្បាលទៀត និង មានគម្រោងចង់ទិញបន្ថែម ១០ ក្បាលទៀត ព្រោះលោកត្រូវការពងមាន់ច្រើនក្នុងការផ្គត់ផ្គង់គ្រួសារដ៏ធំរបស់លោក។ យ៉ាងណាមិញ មេមាន់របស់លោកទិញមកនោះ នៅមិនទាន់ធំធាត់ពេញលេញនៅឡើយទេ ដោយត្រូវការចិញ្ចឹមមើលថែច្រើនសប្ដាហ៍ទៀតទើបអាចមានពងបាន។
គួរបញ្ជាក់ដែរថា ទីក្រុងមួយចំនួនក្នុងរដ្ឋ Texas គឺអនុញ្ញាតឱ្យពលរដ្ឋចិញ្ចឹមមាន់ក្នុងផ្ទះរបស់ពួកគេបាន ប្រសិនបើពួកគេធ្វើតាមបទប្បញ្ញត្តិរបស់ពេទ្យបានត្រឹមត្រូវ។ ជាមួយគ្នានោះដែរ ខាងនាយកដ្ឋានប្រយុទ្ធប្រឆាំងជំងឺឆ្លងនៅអាមេរិក ក៏បានចេញគោលការណ៍ណែនាំពីសុវត្ថិភាពដល់អ្នកដែលចិញ្ចឹមមាន់តាមផ្ទះផងដែរ៕
ប្រភព៖ VN Express
