សារព័ត៌មាន India Today កាលពីថ្ងៃទី ២២ ខែមករា ឆ្នាំ ២០២៥ កន្លងទៅ បានចេញផ្សាយករណីដ៏រន្ធត់មួយដោយអ្នកដំណើរជាច្រើននាក់បាននាំគ្នាលោតចុះពីលើរថភ្លើង ក្រោយឮចចាមអារ៉ាមថារថភ្លើងរបស់ពួកគេមានភ្លើងឆេះ ដែលបណ្ដាលឱ្យមនុស្ស ១១ នាក់ត្រូវរថភ្លើងមួយទៀតបើកបញ្ច្រាសទិសគ្នាបុករហូតបាត់បង់ជីវិត។
ហេតុការណ៍ខាងលើកើតមានលើរថភ្លើងមួយខ្សែឈ្មោះ Puskpak Express ធ្វើដំណើរចេញពី Lucknow ទៅ Mumbai ដោយពេលធ្វើដំណើរទៅដល់សង្កាត់ Jaogaon ភាគខាងលិចរដ្ឋ Maharashtra ស្រាប់តែអ្នកដំណើរឮចចាមអារ៉ាមថាទូរថភ្លើងមានភ្លើងឆេះរហូតមនុស្សនាំគ្នាផ្អើលស្លន់ស្លោទាញហ្វ្រាំងអាសន្នដើម្បីបញ្ឈប់រថភ្លើង។ ក្រោយមក អ្នកដំណើរជាច្រើនក៏បានឆោឡោនាំគ្នាលោតចុះពីរថភ្លើងដើម្បីបំណងគេចខ្លួនពីភ្លើង ប៉ុន្តែជាអកុសលបែរជាត្រូវរថភ្លើងមួយទៀតឈ្មោះ Karnataka Express ដែលធ្វើដំណើរបញ្ច្រាសទិសគ្នាបុកពេញទំហឹងបណ្ដាលឱ្យមនុស្ស ១១ នាក់ស្លាប់ភ្លាមៗ ខណៈ ៥ នាក់ផ្សេងទៀតបានរងរបួស។
គួរបញ្ជាក់ដែរថា ចំពោះចចាមអារ៉ាមថារថភ្លើងមានភ្លើងឆេះនេះគឺនៅមិនទាន់មានការបញ្ជាក់ថាជារឿងពិត ឬ មិនពិតនៅឡើយទេ ប៉ុន្តែបើតាមសារព័ត៌មាន PTI ស្រង់សម្ដីរបស់មន្ត្រីខាងផ្លូវដែកនៅឥណ្ឌាបានលើកឡើងថា ដើមហេតុអាចបណ្ដាលមកពីហ្វ្រាំងរថភ្លើងកើនកម្ដៅខ្លាំងពេករហូតបែកផ្កាភ្លើង ទើបធ្វើឱ្យអ្នកដំណើរផ្អើលថាមានភ្លើងឆេះបែបនេះ៕
