គ្រោះរញ្ជួយដីកម្រិត ៧.៤ រ៉ិចទ័រ បានវាយប្រហារតំបន់ Mindanao នៅប្រទេសហ្វីលីពីន បង្កជាការព្រមានពីរលកយក្សស៊ូណាមិ នេះបើតាមការបញ្ជាក់ពីអ្នកជំនាញផ្នែករញ្ជួយដី។ តាមមជ្ឈមណ្ឌលផ្នែកគ្រោះរញ្ជួយដីនៅអឺរ៉ុប-មេឌីទែរ៉ាណេ (EMSC) បានឱ្យដឹងនៅថ្ងៃទី ១០ ខែតុលា ឆ្នាំ ២០២៥ នេះថា គ្រោះរញ្ជួយដីបានវាយប្រហារក្នុងជម្រៅ ៦២ គីឡូម៉ែត្រទៅក្រោម។
ជាមួយគ្នានោះដែរ ខាងប្រធានភ្នាក់ងារផ្នែកគ្រោះរញ្ជួយដីនៅហ្វីលីពីន លោក Teresito Bacolcol បានបញ្ជាក់ដែរថា ខាងភ្នាក់ងាររបស់លោកបានចេញការប្រកាសអាសន្នពីរលកស៊ូណាមិ ក្រោយគ្រោះរញ្ជួយដីកើតមានឡើងនៅចម្ងាយប្រមាណ ២០ គីឡូម៉ែត្រពីក្រុង Manay វេលាម៉ោង ៩ និង ៤៣ នាទីព្រឹកថ្ងៃទី ១០ ខែតុលា ឆ្នាំ ២០២៥ នេះ ( ពេលវេលាក្នុងតំបន់)។ ក្នុងនោះ ក៏មានការព្យាករណ៍ដែរថា រលកកម្ពស់ ១ ម៉ែត្រអាចនឹងកើតមាននៅឈូងសមុទ្រប៉ាស៊ីហ្វិកនៃប្រទេសហ្វីលីពីន ក្នុងរយៈពេលប្រមាណ ២ ម៉ោងទៀត។
បន្ថែមពីនេះ ខាងភ្នាក់ងារខាងលើក៏បានជំរុញឱ្យពលរដ្ឋរស់នៅតាមតំបន់ឈូងសមុទ្រទាំងអស់ក្នុងទីតាំងដែលប៉ះពាល់ ឱ្យធ្វើការជម្លៀសខ្លួនភ្លាមៗទៅកាន់ទីទួលខ្ពស់ ឬទីតាំងដែលឆ្ងាយពីនេះ៕
ប្រភព៖ ABC News
