កាលពីថ្ងៃទី ០២ ខែមេសា ឆ្នាំ ២០២៥ កន្លងទៅ (ពេលវេលាក្នុងតំបន់) លោកប្រធានាធិបតីអាមេរិក ដូណាល់ ត្រាំ បានធ្វើសន្និសីទកាសែតមួយហៅថា «Make America Rich Again» នៅទីធ្លា Rose Garden ក្នុងសេតវិមាន White House ដោយរូបលោកបានប្រកាសថាជាថ្ងៃមួយក្នុងចំណោមថ្ងៃដែលសំខាន់បំផុតក្នុងប្រវត្តិសាស្ត្រអាមេរិក ពេលលោកប្រកាសដាក់ពន្ធទ្រង់ទ្រាយធំលើដៃគូពាណិជ្ជកម្មពិភពលោក។
អ្វីដែលកាន់តែធ្វើឱ្យពិភពលោកចាប់អារម្មណ៍នោះគឺថា ក្នុងចំណោមបណ្ដាប្រទេសដែលប៉ះពាល់ ក៏មានកោះដាច់ស្រយាលចំនួន ២ ស្ថិតនៅក្បែរតំបន់អង់តាកទិចដែលជាដែនជម្រករបស់ពពួកសត្វ penguins ក៏ត្រូវបានជាប់ពន្ធដូចគ្នា។ កោះ Heard និង កោះ McDonald គឺស្ថិតក្នុងចំណោមទីតាំងដែលដាច់ស្រយាលជាងគេបំផុតលើពិភពលោក ដោយកោះទាំងពីរនេះគឺមានឈ្មោះស្ថិតនៅដែនដីខាងក្រៅនៃប្រទេសអូស្ត្រាលី។
តាមសារព័ត៌មាន The Guardian បានឱ្យដឹងថា ដើម្បីអាចទៅដល់កោះទាំងពីរនេះបាន គឺយើងត្រូវការចាយពេលជិះទូកពីក្រុង Perth ប្រទេសអូស្ត្រាលីទៅរយៈពេល ២ សប្ដាហ៍ពេញ ហើយបើតាមដឹង ពេលចុងក្រោយដែលមានវត្តមានមនុស្សទៅដល់កោះនោះគឺប្រមាណជិត ១០ ឆ្នាំមុន។ បើតាមអង្គការ WWF Australia កោះភ្នំភ្លើងដាច់ស្រយាលទាំងនេះគឺជាប់ឈ្មោះជាឋានសួគ៌របស់សត្វ Penguins។ ពួកវាជាដែនជម្រករបស់ប្រភេទសត្វ penguins ដ៏កម្របំផុត និង សំខាន់ចំពោះប្រព័ន្ធអេកូឡូស៊ីលើភពផែនដីយើងនេះ។
ងាកមកចម្ងល់ហេតុអ្វីបានជាកោះទាំងនេះមានឈ្មោះក្នុងបញ្ជីជាប់ពន្ធថ្មីរបស់អាមេរិក បើតាមខាងសេតវិមាន White House ថ្លែងប្រាប់ POLITICO ថា កោះ Heard និង McDonald ជាប់ក្នុងបញ្ជីឈ្មោះក៏ព្រោះតែកោះទាំងនេះស្ថិតក្នុងដែនដីនៃប្រទេសអូស្ត្រាលី។ យ៉ាងណាមិញ កោះទាំង ២ នេះត្រូវបានចុះឈ្មោះដាច់ដោយឡែកចេញពីប្រទេសអូស្ត្រាលី និង ត្រូវគិតពន្ធ ១០% លើទំនិញនាំចូល៕
