យន្តហោះមួយគ្រឿងរបស់ក្រុមហ៊ុន Endeavor Air ដឹកមនុស្សសរុប ៨០ នាក់ បានជួបគ្រោះថ្នាក់ក្រឡាប់ផ្ងារជើងឡើងលើខណៈពេលចុះចតនៅព្រលានយន្តហោះនាក្រុង Mississauga ប្រទេសកាណាដា តែជាសំណាងល្អមិនមានអ្នកដំណើរណាម្នាក់គ្រោះថ្នាក់ដល់អាយុជីវិតនោះឡើយ។
តាមព័ត៌មានបានឱ្យដឹងថា យន្តហោះ CRJ-900 មានលេខជើងហោះហើរ 4819 បានជួបគ្រោះថ្នាក់ក្រឡាប់ផ្ងារជើងក្រោយចុះចតនៅព្រលាន Toronto Pearson នាវេលាម៉ោងប្រមាណ ៣ និង ៣០ នាទីរសៀលថ្ងៃទី ១៧ ខែកុម្ភៈ ឆ្នាំ ២០២៥ (ពេលវេលាក្នុងតំបន់)។ យន្តហោះមួយគ្រឿងនេះដឹកអ្នកដំណើរសរុប ៧៦ នាក់ និង បុគ្គលិក ៤ នាក់ ដែលហោះចេញពីក្រុង Minneapolis រដ្ឋ Minnesota សហរដ្ឋអាមេរិកមក។
តាមភ្នាក់ងារសង្គ្រោះបានឱ្យដឹងថា ក្នុងហេតុការណ៍នេះមានមនុស្ស ១៥ នាក់បានរងរបួស ក្នុងនោះមាន ៣ នាក់រងរបួសធ្ងន់។ ជនរងគ្រោះទាំងអស់ត្រូវបានដឹកតាមឧទ្ធម្ភាគចក្រទៅសង្គ្រោះនៅមន្ទីរពេទ្យភ្លាមៗផងដែរ។
គួរបញ្ជាក់ដែរថា ជុំវិញហេតុការណ៍គ្រោះថ្នាក់នេះដែរខាងក្រុមហ៊ុនមិនបានបញ្ជាក់លម្អិតជុំវិញមូលហេតុបណ្ដាលឱ្យយន្តហោះជួបគ្រោះថ្នាក់រហូតដល់ក្រឡាប់ផ្ងារឃើងបែបនេះឡើយ។ ជាមួយគ្នានោះដែរ ខាងក្រុមប្រឹក្សាផ្នែកសុវត្ថិភាពមធ្យោបាយដឹកជញ្ជូនប្រចាំសហរដ្ឋអាមេរិក (NSTB) ក៏បានបញ្ជូនភ្នាក់ងារស៊ើបអង្កេតសហការជាមួយខាងក្រុមប្រឹក្សាផ្នែកសុវត្ថិភាពមធ្យោបាយដឹកជញ្ជូនរបស់ប្រទេសកាណាដា ដើម្បីស៊ើបរកមូលហេតុពិតប្រាកដ។
គួរឱ្យដឹងថា មុនកើតហេតុខាងព្រលានយន្តហោះ Toronto Pearson បានធ្វើការចេញព្រមានពីបញ្ហាខ្យល់បោកបក់ខ្លាំង និង អាកាសធាតុចុះត្រជាក់ក្នុងតំបន់នោះ។ ជើងហោះហើរមួយចំនួនមិនអាចហោះហើរតាមកាលកំណត់បាន ដោយសារតែភាគខាងកើតប្រទេសកាណាដាកំពុងរងការវាយប្រហារដោយព្យុះព្រិលកាលពីចុងសប្ដាហ៍កន្លងទៅនេះ៕
