នៅថ្ងៃទី ២៥ ខែកុម្ភៈ ឆ្នាំ ២០២៥ នេះ វេលាម៉ោង ៩ និង ៤៩ នាទីព្រឹក (ពេលវេលាក្នុងតំបន់) មានហេតុការណ៍ដ៏រន្ធត់មួយ ដោយស្ពាននៅទីតាំងការដ្ឋានមួយកន្លែងនៅក្រុង Anseong-si ខេត្ត Gyeonggi-do ប្រទេសកូរ៉េខាងត្បូង បានបាក់រលំភ្លាមៗ បណ្ដាលឱ្យមនុស្សជាច្រើនស្លាប់ និង របួស។
យោងតាមសារព័ត៌មាន Koreaboo បានឱ្យដឹងថា បច្ចុប្បន្នមានមនុស្ស ២ នាក់ស្លាប់ ខណៈ ៧ នាក់ផ្សេងទៀតបានរងរបួស ដោយក្នុងនោះ ៦ នាក់ កំពុងស្ថិតក្នុងស្ថិតក្នុងស្ថានភាពធ្ងន់ធ្ងរ។ ដោយឡែក បើតាមខាងភ្នាក់ងារពន្លត់អគ្គិភ័យបានបញ្ជាក់ដែរថា មានមនុស្សម្នាក់ទៀតកំពុងកប់ជាប់ក្រោមបំណែកស្ពាន ដោយខាងក្រុមសង្គ្រោះកំពុងធ្វើការជួយសង្គ្រោះ។
គួរបញ្ជាក់ដែរថា ទីតាំងកើតហេតុគឺនៅចំណុចការដ្ឋានសាងសង់ដែលតភ្ជាប់ផ្លូវល្បឿនលឿន Anseong-Yongin។ តាមព័ត៌មានបានបញ្ជាក់ថា អំឡុងពេលកំពុងសាងសង់នោះ ផ្ទាំងខាងលើនៃស្ពានដែលមានកម្ពស់ប្រមាណ ១០០ ម៉ែត្រ បានបាក់ធ្លាក់ចុះមកសង្កត់មនុស្សនៅខាងក្រោមតែម្ដង ហើយចំពោះក្រុមហ៊ុនដែលទទួលខុសត្រូវការសាងសង់ត្រូវបានឱ្យដឹងថាជាក្រុមហ៊ុន Hyundai Engineering៕
