នាពេលថ្មីៗនេះ មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការចាប់អារម្មណ៍ និង ចែករំលែកបន្តគ្នា នូវឃ្លាថា ៖ «ហូបស្ពឺអត់?» ដែលជាឃ្លាកំពុងពេញនិយម ពិសេសត្រូវបានយុវវ័យប្រើប្រាស់ក្នុងន័យកម្សាន្ត និង ផ្ដោះផ្ដងក្នុងន័យរម្យទមគួរឱ្យចាប់អារម្មណ៍។
យ៉ាងណាមិញ ឃ្លា «ហូបស្ពឺអត់?» នេះផងដែរ គឺជាឃ្លាដែលបានដកស្រង់ចេញពីសៀវភៅ «ពេជ ចន្ទមុន្នី ភរិយានាយករដ្ឋមន្ត្រីទី៣៧ នៃកម្ពុជា» នៅទំព័រទី ៧៣ ដែលបង្ហាញពីគ្រាផ្ដើមស្នេហ៍មួយ នៃនាយករដ្ឋមន្ត្រីបច្ចុប្បន្នរបស់កម្ពុជា គឺសម្ដេចមហាបវរធិបតី ហ៊ុន ម៉ាណែត និង លោកជំទាវ ពេជ ចន្ទមុន្នី។
ស្របពេលរឿងផ្លែស្ពឺកំពុងតែផ្ទុះក្ដៅគគុកនៅតាមបណ្ដាញសង្គមនានាក្នុងប្រទេសកម្ពុជា រឿងនេះដែរក៏បានលេចឮដល់សម្ដេចតេជោ ហ៊ុន សែន រហូតសម្តេចឆ្ងល់ធ្វើការស្រាវជ្រាវទើបដឹងថាជារឿងរបស់កូនប្រុសជានាយករដ្ឋមន្ត្រីបច្ចុប្បន្នរបស់ប្រទេសកម្ពុជា។ ជាមួយគ្នានោះដែរ សម្តេចក៏បានមានប្រសាសន៍បន្ថែមឱ្យដឹងទៀតថា រឿងកូនប្រុសចាប់ផ្ដើមពីផ្លែស្ពឺ គឺជារឿងដូចគ្នារវាងសម្តេច និង លោកជំទាវ ដែលផ្ដើមចេញពីការមិនចូលចិត្តគ្នាដូចគ្នា។
តាមសំណេររបស់សម្តេចតេជោ ហ៊ុន សែន បានមានប្រសាសន៍លើបណ្ដាញសង្គមហ្វេសប៊ុនលម្អិតថា៖ «ប៉ុន្មានឆ្នាំមុនផ្ទុះរឿងផ្លែពោតជាអាវុធប្រល័យលោក។ ប៉ុន្មានថ្ងៃនេះផ្ទុះរឿងផ្លែស្ពឺ ខ្ញុំចេះតែឆ្ងល់ថាមានរឿងអីទៀតហើយ? លុះដល់ស្រាវជ្រាវទៅទើបដឹងថាវាជារឿងរបស់នាយករដ្ឋមន្ត្រីបច្ចុប្បន្នជាមួយស្ត្រីទីមួយកាលពីក្មេង ដែលផ្អែកសំខាន់លើសៀវភៅដែលសរសេរដោយលោក ឆាយ សុផល។ វាជារឿងចាប់ផ្តើមពីការមិនចូលចិត្តដូចគ្នារវាងខ្ញុំ និងភរិយានៅពេលដែលមិនទាន់ស្គាល់គ្នា។ ឯកូនរបស់ខ្ញុំចាប់ផ្តើមពីផ្លែស្ពឺ ឬ(ហូបស្ពឺអត់)។ ខ្ញុំស្រាវជ្រាវរឿងនេះពីគ្រុបគ្រួសារដែលប្អូនៗពិសេសស្រីពៅ បង្អាប់បងថ្លៃ (ហូបស្ពឺអត់)»៕
\ 
