បើនិយាយដល់កំពូលតារាចម្រៀងស្រី Taylor Swift មហាជនអ្នកគាំទ្រធ្លាប់រំភើបចិត្តម្ដងរួចមកហើយ នៅពេលរូបនាងប្រកាសភ្ជាប់ពាក្យជាមួយគូស្នេហ៍ Travis Kelce កាលពីថ្ងៃទី ២៦ ខែសីហា ឆ្នាំ ២០២៥ កន្លងទៅ ជាមួយនឹង background ជាផ្កាចម្រុះពណ៌ដូចក្នុងរឿងព្រេងនិទាន និង ចិញ្ចៀនពេជ្រមួយវង់ដ៏ធំប្រណីតបំផុត។
យ៉ាងណាមិញ ឥលូវនេះ អ្នកគាំទ្រក៏កាន់តែរំភើបចិត្តមួយកម្រិតទៀត នៅពេលដែលដឹងថា តារាក្នុងដួងចិត្តរបស់ពួកគេរូបនេះ ជិតរៀបការក្លាយជាគ្រួសារពេញលេញជាមួយគូដណ្ដឹងហើយនៅត្រឹមប៉ុន្មានខែខាងមុខនេះទៀតប៉ុណ្ណោះ។
ជាក់ស្ដែង តាមការចេញផ្សាយរបស់ Page Six កាលពីថ្ងៃទី ០៥ ខែធ្នូ ឆ្នាំ ២០២៥ កន្លងទៅ ទទួលបានព័ត៌មានពីប្រភពជិតស្និទ្ធនឹង Taylor Swift បានទម្លាយថា គូស្នេហ៍តារាដ៏ល្បីមួយគូនេះ នឹងចាប់ដៃគ្នាចូលរោងការប្ដូរឈ្មោះជាប្ដីប្រពន្ធនៅថ្ងៃសៅរ៍ ទី ១៣ ខែមិថុនា ឆ្នាំ ២០២៦ ខាងមុខនេះ ដោយទីតាំងរៀបចំពិធីមង្គលគឺនៅ Ocean House តំបន់ Watch Hill កោះ Rhode សហរដ្ឋអាមេរិក៕
