រយៈពេលរាប់ឆ្នាំមកនេះ លោកយាយចំណាស់ម្នាក់អាយុ ៩៨ ឆ្នាំនៅសៀងហៃ ប្រទេសចិន គឺបានតស៊ូរស់នៅជាមួយសាច់ដុះលើថ្ងាសដែលចេញមកដូចជាស្នែង។ សាច់នោះដុះមកប្រវែងប្រមាណជាង ៣ ទៅ ៤ សង់ទីម៉ែត្រ ហើយជនជាតិចិនភាគច្រើនហៅវាថាជា «ស្នែងអាយុវែង»។
រូបភាព AI
យ៉ាងណាមិញ នៅពេលថ្មីៗនេះ ខណៈទៅមន្ទីរពេទ្យសម្រាកព្យាបាលជំងឺផ្សេង លោកយាយខាងលើក៏មានអារម្មណ៍ធុញមិនស្រណុកនឹងស្នែងដុះលើថ្ងាស ហើយក៏បានទាញយកកន្ត្រៃមួយមកកាត់វាចោលដោយមិនបានពិភាក្សាសួរនាំគ្រូពេទ្យអ្វីឡើយ។
ក្រោយកាត់ចេញ ថ្ងាសរបស់លោកយាយក៏ចាប់ផ្ដើមហើមភ្លាម ឯមុខរបួសចាប់ផ្ដើមហូរឈាមមិនឈប់រហូតបណ្ដាលឱ្យគាត់ស្ថិតក្នុងស្ថានភាពធ្ងន់ធ្ងរ តែជាសំណាងល្អ គ្រូពេទ្យប្រចាំការនៅថ្ងៃនោះគឺជាគ្រូពេទ្យផ្នែកវះកាត់ ដោយបានធ្វើការវះកាត់បន្ទាន់ភ្លាមៗលើលោកយាយរហូតទទួលបានជោគជ័យ។
ក្រោមការជួយសង្គ្រោះពីក្រុមគ្រូពេទ្យ របួសលោកយាយក៏បានធូរស្បើយឆាប់ជាសះ ហើយក្រុមគ្រួសាររបស់លោកយាយក៏សម្ដែងការអរគុណជាខ្លាំងដល់ក្រុមវេជ្ជបណ្ឌិតទាំងអស់ដែលបានសង្គ្រោះ និង ថែទាំលោកយាយដោយយកចិត្តទុកដាក់៕
