ថ្មីៗនេះ ស្វាមីតារាសម្ដែងស្រីហុងកុងដ៏ល្បី Myolie Wu លោក Philip Lee កំពុងជួបប្រទះនឹងរឿងអាស្រូវផិតក្បត់ប្រពន្ធយ៉ាងក្ដៅគគុក ក្រោយកម្រងរូបភាពជាច្រើនបង្ហាញពីសកម្មភាពស្និទ្ធស្នាលឱបថើបមនុស្សស្រីច្រើននាក់ក្នុងក្លឹបរាត្រីមួយកន្លែងត្រូវបានចែកចាយពាសពេញបណ្ដាញសង្គមក្នុងប្រទេសចិន។
តាមសារព័ត៌មាននៅហុងកុងបានឱ្យដឹងថា ស្វាមីតារាស្រី Myolie Wu ថ្មីៗនេះបានរៀបចំធ្វើខួបកំណើតគម្រប់អាយុ ៥២ ឆ្នាំរបស់លោកក្នុងក្លឹបរាត្រីមួយកន្លែងដោយគ្មានវត្តមានប្រពន្ធ និង កូនៗទាំង ៣ នាក់ឡើយ។ យ៉ាងណាមិញ អំឡុងពេលជប់លៀងយ៉ាងសប្បាយរីករាយនោះ អ្នកជំនួញប្រុសរូបនេះក៏ត្រូវបានឃើញឱប និង ថើបស្រីៗដែលចូលរួមកម្មវិធីយ៉ាងស្និទ្ធស្នាលបំផុត។ រូបភាពទាំងប៉ុន្មានត្រូវបានចែកចាយពាសពេញបណ្ដាញសង្គមរហូតធ្វើឱ្យមហាជនជាច្រើនផ្ទុះប្រតិកម្មវែកញែកថា តារាស្រី TVB រូបនោះកំពុងត្រូវបានប្ដីលួចផិតក្បត់។
គួរឱ្យដឹងដែរថា នេះមិនមែនជាលើកទី ១ ឡើយដែលលោក Philip Lee រងរឿងអាស្រូវស្នេហានេះ។ ជាក់ស្ដែង មុនចាប់ដៃរៀបការជាមួយ Myolie Wu ក្នុងឆ្នាំ ២០១៥ លោកគឺផ្ទុះល្បីថាជា playboy មានចំណងស្នេហ៍ជាមួយស្រីស្អាតជាច្រើនដោយសុទ្ធសឹងជាលំដាប់រង និង បវរកញ្ញានៅហុងកុង។
ខណៈរឿងអាស្រូវកំពុងតែក្ដៅគគុក ខាងតារាស្រី Myolie Wu និង លោក Philip Lee នៅរក្សាភាពស្ងៀមស្ងាត់ ដោយមិនទាន់មានការឆ្លើយតបអ្វីឡើយជុំវិញបញ្ហានេះ ទាំងអ្នកគាំទ្ររបស់ពួកគេកំពុងអន្ទះអន្ទែងចង់ដឹងការឆ្លើយតបបកស្រាយច្បាស់ៗ៕
