យន្តហោះ Boeing 787-7 Dreamliner ជើងហោះហើរលេខ AI-171 ហោះចេញពី Ahmedabad ទៅទីក្រុងឡុងដុង បានជួបគ្រោះថ្នាក់ធ្លាក់ផ្ទុះឆេះកាលពីព្រឹកថ្ងៃទី ១២ ខែមិថុនា ឆ្នាំ ២០២៥ កន្លងទៅ ក្រោយហោះចេញបានត្រឹមប៉ុន្មានវិនាទី បណ្ដាលឱ្យមនុស្សសរុបទាំងលើយន្តហោះ និង នៅក្រោមដីចំនួន ២៦០ នាក់បាត់បង់ជីវិត។
យ៉ាងណាមិញ ជាសំណាងក្នុងមួយលានគ្រោះថ្នាក់ ក្នុងហេតុការណ៍ខាងលើមានបុរសម្នាក់ឈ្មោះ Vishwas អាចរួចផុតជីវិត ប៉ុន្តែហេតុការណ៍ដ៏រន្ធត់មួយនេះមកទល់ពេលនេះនៅតែលងបន្លាចបុរសជាជនរងគ្រោះនោះដដែល។ ជាក់ស្ដែង បើតាមបងប្អូនជីដូនមួយរបស់បុរសខាងលើបានបញ្ជាក់ថា Vishwas បច្ចុប្បន្នគឺមានបញ្ហាពិបាកក្នុងការគេង ដោយញឹកញាប់លោកតែងតែភ្ញាក់នៅកណ្ដាលយប់ ហើយលែងអាចគេងលក់ទៅវិញ។ ក្រុមគ្រួសាររបស់លោកបាននាំលោកទៅជួបគ្រូពេទ្យផ្នែកចិត្តសាស្ត្រដើម្បីទទួលការព្យាបាលផ្លូវអារម្មណ៍ដែលប៉ះទង្គិចពីហេតុការណ៍នេះ។
ថ្លែងប្រាប់សារព័ត៌មាន PTI បងប្អូនជីដូនមួយរូបនោះបានរៀបរាប់ទៀតថា៖ «គាត់លែងនិយាយរកនរណាទាំងអស់។ សាច់ញាត់ជាច្រើននៅបរទេសបានទាក់ទងមកសួរសុខទុក្ខ ប៉ុន្តែ Vishwas គឺមិនព្រមនិយាយអីឡើយ។ គាត់នៅតែស្លុតពីរឿងគ្រោះថ្នាក់ និង ការបាត់បង់ប្អូនប្រុសរបស់គាត់ក្នុងហេតុការណ៍នោះ»៕
