កាលពីព្រឹកថ្ងៃទី ១០ ខែកុម្ភៈ ឆ្នាំ ២០២៥ កន្លងទៅ (ពេលវេលាក្នុងតំបន់) មានករណីគ្រោះថ្នាក់ចរាចរណ៍ដ៏រន្ធត់មួយបានកើតមានឡើងក្នុងប្រទេស Guatemala ដោយរថយន្តក្រុងមួយគ្រឿងបានបើកធ្លាក់ស្ពានចូលទៅក្នុងជ្រោះ បណ្ដាលឱ្យមនុស្សរហូតដល់ទៅ ៥១ នាក់បាត់បង់ជីវិត។
តាមព័ត៌មានបានឱ្យដឹងថា រថយន្តក្រុងមួយគ្រឿងនោះបានបើកបរលើផ្លូវ highway ដ៏មមាញឹកនៅក្រៅក្រុង Guatemela ហើយក៏ស្រាប់តែជួបគ្រោះថ្នាក់ផ្លោងធ្លាក់ពីលើស្ពាន Puente Belice ក្នុងកម្ពស់ប្រមាណ ១៩ ម៉ែត្រចូលទៅក្នុងជ្រោះ។ តាមរូបភាពថតបានពីកន្លែងកើតហេតុបង្ហាញឱ្យឃើញសភាពឡានខ្ទេចខ្ទីក្រឡាប់ផ្ងារជើង ខណៈក្រុមសង្គ្រោះជាច្រើនព្យាយាមទាញជនរងគ្រោះដែលស្លាប់ និង របួសចេញពីក្នុងឡាន។ ក្នុងការជួយសង្គ្រោះនោះដែរ ក្រុមសង្គ្រោះជួយបានអ្នកដំណើរចំនួន ២០ នាក់ និង បានបញ្ជូនទៅព្យាបាលនៅមន្ទីរពេទ្យ។ ដោយឡែក សាកសពមនុស្សចំនួន ៥១ នាក់ផ្សេង (ប្រុស ៣៦ នាក់ និង ស្រី ១៥ នាក់) ត្រូវបានបញ្ជូនទៅកន្លែងតម្កល់សពដែលរៀបចំឡើងសម្រាប់ដាក់សពជនរងគ្រោះដោយគ្រោះថ្នាក់ចរចរណ៍នេះ។
តាមការបញ្ជាក់ពីអ្នកនាំពាក្យពីខាងការិយាល័យរដ្ឋអាជ្ញាសាធារណៈបាននិយាយថា ពួកគេនឹងដាក់ស្នើសុំរបាយការណ៍ពិនិត្យសារធាតុថ្នាំលើអ្នកបើកបរដែលមានឈ្មោះ Billy Foronda អាយុ ២៤ ឆ្នាំ (ស្ថិតក្នុងចំណោមជនរងគ្រោះដែលស្លាប់) និង ប្អូនប្រុសរបស់គេ Anibal Foronda ដែលរួចផុតជីវិតកំពុងព្យាបាល។ អ្នកនាំពាក្យដដែលបានបន្ថែមទៀតថា ខាងក្រុមស៊ើបអង្កេតចង់ច្រានចោលលើការសង្ស័យថាមានអ្នកផឹកគ្រឿងស្រវឹង ឬស្ថិតក្រោមការប្រើប្រាស់ថ្នាំណាមួយអំឡុងពេលបើកបរ។
ជាមួយគ្នានោះដែរ លោក Helver Belteton ឧត្តមសេនីយ៍រងនៃប៉ូលិសជាតិប្រទេស Guatemala បានលើកឡើងដែរថា៖ «រថយន្តក្រុងនោះបានបើកបរលើផ្លូវខុសប្លែកពីធម្មតា។ ឥលូវយើងមិនអាចផ្ដល់ចម្លើយផ្លូវការបានឡើយជុំវិញករណីដែលបានកើតឡើងនេះ ប៉ុន្តែពួកយើងគឺមិនច្រានចោលនូវរាល់សមិទ្ធកម្មនានាឡើយ រួមទាំងការបាត់បង់ម្ចាស់ការលើរថយន្តដោយសារចាប់ហ្វ្រាំងមិនស៊ី»៕
ប្រភព៖ Dailymail
