ជារឿងដ៏គួរឱ្យភ្ញាក់ផ្អើលមួយសម្រាប់អ្នកស្នេហាវិស័យ K-pop ដោយក្ដៅៗថ្មីៗនេះ តារាចម្រៀង Park Bom សមាជិកក្រុម 2NE1 បានសម្រេចចិត្តដាក់ពាក្យប្ដឹងលោក Yang Hyun Suk ទាមទារប្រាក់កម្រៃដែលមិនបើកឱ្យនាងក្នុងចំនួនច្រើនមហិមានឹកស្មានមិនដល់។
ជាក់ស្ដែង តាមរយៈការបង្ហោះលើគណនី Instagram ផ្ទាល់ខ្លួន (បច្ចុប្បន្នលុបចោលវិញហើយ) Park Bom បានបង្ហោះរូបភាពក្រដាសមួយសន្លឹកដែលនាងបានប្ដឹងលោក Yang Hyun Suk។
ក្នុងក្រដាសបណ្ដឹងនោះ នាងបានចោទលោក Yang Hyun Suk ថាបានក្លែងបន្លំ និង បោកប្រាស់នាង រឿងប្រាក់កម្រៃមិនបើកឱ្យនាងក្នុងរយៈពេលដ៏យូរ។ ប្រាក់កម្រៃដែលនាងសំដៅលើនោះគឺលើកម្រៃដែលទទួលបានពីការលក់អាល់ប៊ុម ការឡើងឆាកសម្ដែង ការផ្សព្វផ្សាយពាណិជ្ជកម្ម និង សកម្មភាពកម្សាន្តផ្សេងៗទៀត។
អ្វីដែលភ្ញាក់ផ្អើលបំផុតនោះ គឺចំនួនទឹកប្រាក់ដែល Park Bom ទាមទារ ដែលជាចំនួនច្រើនបំផុតមិនធ្លាប់បានឃើញពីមុនមក។ ក្នុងក្រដាសដែលនាងបានបង្ហោះនោះ គឺមានកំណត់ទឹកប្រាក់ចំនួន 100200300400600700100034’64272e ទ្រីលានវ៉ុន ស្មើនឹងចំនួន ១,០០២,០០៣,០០៤,០០៦,០០៧,០០១,០០០,០៣៤,០០០,០០០,០០០ វ៉ុន ឬជាដុល្លារចំនួន ៧០០,៤៥៩,៩៩៩,៩៩៩,៩៩៩,៩៧២,៧០៣,៥៥៩,២២៥,៤៤២,៣០៤ ដុល្លារ ដែលចំនួនទឹកប្រាក់នេះដែរគឺច្រើនមហិមាខ្លាំងគ្មាននរណាម្នាក់ធ្លាប់មានលើលោកនេះឡើយ។
បច្ចុប្បន្ន ខាងផលិតកម្ម YG មិនទាន់ចេញការឆ្លើយតបណាមួយជុំវិញពាក្យបណ្ដឹងរបស់ Park Bom ឡើយ៕
ប្រភព៖ Koreaboo
