ប្រិយមិត្តដែលចូលចិត្តសត្វ និង តែងតែតាមដានគណនីរបស់លោក ទ្រី ស៊ីថេង ប្រាកដណាស់តែងតែបានឃើញសកម្មភាពរបស់លោក និង ដំរី Lucky ជានិច្ច ប៉ុន្តែឥលូវនេះ គ្រប់គ្នាអាចនឹងលែងឃើញសកម្មភាពរបស់អ្នកទាំងពីរជាមួយគ្នាទៀតហើយ ដោយសារតែលោក ទ្រី ស៊ីថេង បានសម្រេចចិត្តលាឈប់ពីកន្លែងដែលលោកស្រឡាញ់ និង ធ្វើដោយបេះដូងអស់រយៈពេល ៣១ ឆ្នាំមកនេះ។
អ្វីដែលរឹតតែធ្វើឱ្យមហាជនកម្ពុជាជាច្រើនរំជួលចិត្តកាន់តែខ្លាំងរហូតទប់ទឹកភ្នែកមិនជាប់នោះ គឺនៅថ្ងៃដែលលោក ទ្រី ស៊ីថេង ចាកចេញ គឺឃើញដំរី Lucky បានរត់ផងស្រែកយំផងតាមម៉ូតូរបស់លោកឃាំងនៅពីមុខហាក់បង្ហាញពីអារម្មណ៍មិនចង់ឱ្យម្ចាស់របស់ខ្លួនចាកចោលទៅឡើយ។
ជាការពិតណាស់ រឿងរ៉ាវនៃការលាឈប់ពីការងាររបស់លោក ទ្រី ស៊ីថេង កំពុងក្លាយជាប្រធានបទដ៏ក្ដៅគគុកនៅតាមបណ្ដាញសង្គមហ្វេសប៊ុក ដោយមានមហាជន ក៏ដូចជាអ្នកសិល្បករជាច្រើនបានសម្ដែងការអាណិតចំពោះដំរី Lucky ក៏ដូចជាបង្ហាញបំណងចង់ឱ្យលោក ទ្រី ស៊ីថេង អាចនៅជាមួយគ្នាបានដូចមុនវិញ។
ស្របពេល មហាជនក៏ដូចជាអ្នកសិល្បករកំពុងផ្ទុះការចាប់អារម្មណ៍លើរឿងនេះខ្លាំង មុននេះបន្តិច គណនីមួយឈ្មោះ Pisey-ពិសី ដែលប្រិយមិត្តមួយចំនួនស្គាល់ថាជាបុគ្គលិកម្នាក់នៅសួនសត្វភ្នំតាម៉ៅដែរនោះ បានធ្វើការបង្ហោះសារមួយរឹតតែធ្វើឱ្យមហាជនក្ដុកក្ដួលចិត្តខ្លាំងរហូតស្រក់ទឹកភ្នែកហូរមកឯង។ សារអមដោយរូបភាពរបស់លោក ពិសី និង លោក ទ្រី ស៊ីថេង បានរៀបរាប់ថា៖ «ពីរឆ្នាំមុនគាត់ញញឹម តែពេលយប់មិញគាត់យំពេញមួយយប់»៕
