ប្រិយភាពមួយចំនួនបានដឹងរួចមកហើយ កាលពីខែធ្នូ ឆ្នាំ ២០២៤ កន្លងទៅ តារាចម្រៀងស្រី Selena Gomez បានប្រកាសជាសាធារណៈពាក់ចិញ្ចៀនភ្ជាប់ពាក្យជាមួយលោក Benny Blanco ប្ដូរឈ្មោះជាគូដណ្ដឹងនឹងគ្នា ក្រោយទាក់ទងមើលចិត្តថ្លើមគ្នាអស់រយៈពេល ១ ឆ្នាំ។
យ៉ាងណាមិញ នៅថ្ងៃទី ២៩ ខែសីហា ឆ្នាំ ២០២៥ នេះ តារាចម្រៀង Selena Gomez បានធ្វើឱ្យអ្នកគាំទ្ររំភើបចិត្តជាថ្មី នៅពេលដែលរូបនាងបានបង្ហោះរូបភាពជាច្រើនលើបណ្ដាញសង្គម Instagram ដែលជារូបភាពរបស់នាង និង មិត្តភក្តិ កំពុងជប់លៀងលាភាពនៅលីវ ឱ្យនាង ដែលត្រៀមខ្លួននឹងក្លាយជាកូនក្រមុំដ៏ស្រស់សោភាក្នុងថ្ងៃមង្គលនាពេលដ៏ខ្លីខាងមុខនេះ។
គួរឱ្យដឹងថា បើតាមសារព័ត៌មាន Daily Mail បានចេញផ្សាយកាលពីពេលកន្លងទៅ តាមការបញ្ជាក់ពីប្រភពជិតដិតមួយបានទម្លាយថា តារាចម្រៀង Selena Gomez និង អនាគតស្វាមី Benny Blanco គឺគ្រោងដឹកដៃគ្នាចូលរោងការក្នុងពិធីរៀបចំឡើងរយៈពេល ២ ថ្ងៃ នៅវីឡាដ៏ប្រណីតតម្លៃ ៣៥ លានដុល្លាររបស់ពួកគេនៅរដ្ឋ California សហរដ្ឋអាមេរិក នៅខែកញ្ញា ឆ្នាំ ២០២៥ ខាងមុខនេះ៕
