ថ្មីៗនេះ តុលាការកំពូលក្នុងប្រទេសឥណ្ឌាបានបញ្ជាឱ្យបង្កើតក្រុមដែលដឹកនាំដោយចៅក្រមចូលនិវត្តន៍ ដើម្បីស៊ើបអង្កេតការចោទប្រកាន់លើករណីនាំសត្វចូលខុសច្បាប់ និង ភាពមិនប្រក្រតីផ្នែកហិរញ្ញវត្ថុនៅសួនសត្វ Vanrara ដែលជាសួនសត្វឯកជនមួយរបស់លោក Anant Ambani កូនប្រុសមហាសេដ្ឋីឥណ្ឌា Mukesh Ambani។
សួនសត្វ Vantara មានទីតាំងស្ថិតនៅរដ្ឋ Gujarat ត្រូវបានចាត់ទុកជា «មជ្ឈមណ្ឌលសង្គ្រោះសត្វព្រៃធំជាងគេបំផុតលើពិភពលោក» ដោយបច្ចុប្បន្ននេះជាដែនជម្រកសត្វដំរីជាង ២០០ ក្បាល សត្វតោ ២០០ ក្បាល សត្វខ្លារខិន ២៥០ ក្បាល សត្វក្រពើ ៩០០ ក្បាល រួមទាំងប្រភេទសត្វព្រៃដទៃជាង ១៥ ម៉ឺនក្បាលទៀត។
បើទោះជាទីតាំងសួនសត្វមួយនេះត្រូវបានលោកនាយករដ្ឋមន្ត្រី Narendra Modi ចុះទស្សនកិច្ចដោយផ្ទាល់ និង បង្ហាញការកោតសរសើរក៏ពិតមែន ប៉ុន្តែខាងក្រុមបរិស្ថានបានលើកឡើងថា អាកាសធាតុដ៏អាក្រក់នៅរដ្ឋ Gujarat គឺមិនសមស្របសម្រាប់សត្វទាំងនោះឡើយ និង បារម្ភថាវាអាចក្លាយជាទីតាំងប្រមូលទុកសត្វជាលក្ខណៈឯកជនមួយសម្រាប់ក្រុមគ្រួសារលោក Ambani។ បន្ថែមពីនេះ ទីតាំងសួនសត្វនេះដែរគឺមិនបើកជាសាធារណៈនោះឡើយ ដោយទទួលបានការរិះគន់យ៉ាងចាស់ដៃពីក្រុមអ្នកអភិរក្ស។
តាមការស្រាវជ្រាវស៊ើបអង្កេតមួយដោយធ្វើឡើងសហការគ្នារវាងកាសែតអាល្លឺមង់ Suddeutsche Zeitung និង ភ្នាក់ងារសារព័ត៌មានរបស់វេណេស៊ុយអេឡា Armando Info បានរកឃើញថា យ៉ាងហោចណាស់សត្វព្រៃ ៣៩០០០ ក្បាលត្រូវបាននាំចូល។ ក្នុងចំណោមនោះមានសត្វស្វា orangutan ១៤ ក្បាល និង ស្វា gorilla ភ្នំមួយក្បាល។ សត្វភេយក្សជាង ១០០ ក្បាល និង សត្វ anteaters ១៤២ ក្បាល ត្រូវបាននាំចេញពីប្រទេសវេណេស៊ុយអេឡា សត្វពស់ថ្លាន់ពណ៌បៃតងចំនួន ៤៨១ ក្បាលយកពីម៉ាឡេស៊ី និង សត្វព្រាប ៥២០ ក្បាលយកពីឥណ្ឌូនេស៊ី។
មកដល់ថ្ងៃទី ២៥ ខែសីហា ឆ្នាំ ២០២៥ កន្លងទៅ ខាងតុលាការកំពូលនៅឥណ្ឌាបានប្រកាសថា ពួកគេនឹងបង្កើតក្រុមដែលដឹកនាំដោយចៅក្រមចូលនិវត្តន៍ ដើម្បីបញ្ជាក់ពីករណីបំពាននេះ ជាពិសេសគឺលើការនាំចូលសត្វដំរីដោយខុសច្បាប់ ការរំលោភលើបទប្បញ្ញត្តិនៃការអភិរក្ស រួមនឹងករណីលាងលុយកខ្វក់។ បើតាមការសង្កត់បញ្ជាក់ពីតុលាការ របាយការណ៍ស៊ើបអង្កេតនឹងត្រូវដាក់ជូនត្រឹមថ្ងៃទី ១២ ខែកញ្ញា ឆ្នាំ ២០២៥ ខាងមុខ។
ជុំវិញករណីនេះដែរ ខាងសួនសត្វ Vantara ក៏បានចេញសារលិខិតផ្លូវការមួយឆ្លើយតបផងដែរ ដោយពួកគេបញ្ជាក់ថា នឹងចូលរួមសហការដោយពេញទី និង ប្តេជ្ញាក្នុងកិច្ចប្រតិបត្តិការប្រកបដោយតម្លាភាព មនុស្សធម៌ និង អនុលោមតាមច្បាប់។ ខាងសួនសត្វបានសង្កត់ន័យដែរថា៖ «បេសកកម្មរបស់ពួកយើងគឺដើម្បីជួយសង្គ្រោះ ថែទាំ និង ជួយស្ដារសត្វទាំងនោះឡើយវិញ»៕
ប្រភព៖ Kenh14
