ក្រុមហ៊ុនដេញថ្លៃមួយនៅប្រទេសអង់គ្លេស បានដាក់ដេញថ្លៃសំបុត្រសរសេរដោយដៃលើកប៉ាល់ទីតានិចរបស់បុរសម្នាក់ឈ្មោះ Gracie ក្នុងឆ្នាំ ១៩១២ ដោយលក់បានក្នុងតម្លៃរហូតដល់ ៣៩៩ ០០០ ដុល្លារ ធ្វើឱ្យសំបុត្រនេះដែរក្លាយជាសំបុត្រសរសេរលើកប៉ាល់ទីតានិចដែលដេញថ្លៃលក់បានក្នុងតម្លៃថ្លៃជាងគេបំផុត។
កាលពីចុងសប្ដាហ៍កន្លងទៅ ក្រុមហ៊ុនដេញថ្លៃ Henry Aldridge & Son នៅតំបន់ Wiltshire ប្រទេសអង់គ្លេស បានដាក់ដេញថ្លៃសំបុត្រដែលលោក Gracie សរសេរលើកប៉ាល់ទីតានិច ដោយលក់បានក្នុងតម្លៃ ៣០ ម៉ឺនផោន (៣៩៩ ០០០ ដុល្លារ) ដែលតម្លៃទទួលបាននេះគឺលើស ៥ ដងនៃតម្លៃរំពឹងទុក ៦ ម៉ឺនផោន (៨ ម៉ឺនដុល្លារ)។
ខាងក្រុមហ៊ុនខាងលើបានបញ្ជាក់ឱ្យដឹងទៀតថា សំបុត្រដែលសរសេរដោយអ្នករួចផុតជីវិត និង មានភាពល្បីល្បាញដូចជាលោក Archibald Gracie នេះ គឺកម្រនឹងមានដាក់ដេញថ្លៃលក់ណាស់។ នេះជាលើកដំបូងហើយដែលសំបុត្របែបនេះបានដាក់លក់លើទីផ្សារនោះ។
លោកកាពីទែន Archibald Gracie (១៨៥៨-១៩១២) គឺជាអ្នកដំណើរ first class ម្នាក់លើកប៉ាល់ទីតានិច។ លោកទទួលបានភាពល្បីល្បាញក្រោយសរសេរសៀវភៅមួយក្បាលមានចំណងជើងថា «The Truth About Titanic» ដែលរៀបរាប់ពីបទពិសោធរបស់លោកអំឡុងពេលជួបសោកនាដកម្មលិចកប៉ាល់ទីតានិចនៅថ្ងៃទី ១៥ ខែមេសា ឆ្នាំ ១៩១២ ដែលបានសម្លាប់មនុស្សអស់ ១៥០០ នាក់។ សៀវភៅនោះដែរ ត្រូវបានចាត់ទុកជាសៀវភៅដែលរៀបរាប់លម្អិត និង រស់រវើកបំផុតជុំវិញហេតុការណ៍ដែលបានកើតឡើងនៅពេលនោះ៕
