នៅថ្ងៃទី ២៨ ខែមីនា ឆ្នាំ ២០២៥ នេះ មានគ្រោះរញ្ជួយដីកម្រិតធ្ងន់ ៧.៧ រ៉ិចទ័រមួយបានវាយប្រហារលើប្រទេសមីយ៉ាន់ម៉ា ដែលបណ្ដាលឱ្យមានការប៉ះពាល់ទៅដល់បណ្ដាប្រទេសជិតខាងមួយចំនួនផងដែរ។ ក្នុងនោះ ប្រទេសថៃ មានការរាយការណ៍ថាបានរងការរញ្ជួយដីនៅតាមតំបន់ជាច្រើនពាសពេញប្រទេស ជាពិសេសនៅភាគខាងជើង និង ភាគកណ្ដាល រួមទាំងទីក្រុងបាងកក។
ថ្មីៗនេះ លោកស្រី Sukanya Yawinchan អគ្គនាយកប្រចាំអគ្គនាយកដ្ឋានឧតុនិយម បានទម្លាយឱ្យដឹងថា ហេតុការណ៍គ្រោះធម្មជាតិដ៏កាចសាហាវមួយនេះដែរបានប៉ះពាល់ដល់សំណង់អគារខ្ពស់ៗមួយចំនួនដែលមិនមានគ្រឹះរឹងមាំល្អក្នុងការទប់ទល់នឹងគ្រោះរញ្ជួយដីនោះ។ បន្ថែមពីនេះ លោកស្រីក៏បានសង្កត់បញ្ជាក់ថា វាចាំបាច់ណាស់ក្នុងការបន្តតាមដានការរញ្ជួយដីម្ដងទៀត ព្រោះវាក៏អាចមានលក្ខណៈធ្ងន់ធ្ងរ និង ប៉ះពាល់ដល់ប្រជាពលរដ្ឋដូចគ្នា។
ក្នុងនោះដែរ អាជ្ញាធរប្រទេសថៃបានបញ្ជាក់ថាស្ថានការណ៍គឺនៅមិនទាន់នឹងនឡើងវិញនៅឡើយទេ ហើយការខូចខាតក៏មានការរាយការណ៍ជាបន្តបន្ទាប់ដែរ។ ជាមួយគ្នានោះ លោកស្រី Paethongtarn Shinawatra នាយករដ្ឋមន្ត្រីប្រទេសថៃ ក៏បានដាក់ចេញការប្រកាសអាសន្នលើទីក្រុងបាងកកជុំវិញគ្រោះរញ្ជួយដីកម្រិតធ្ងន់នេះដែរ។ ការរញ្ជួយដីថ្មីនឹងត្រូវតាមដានក្នុងពេល ២ ម៉ោងក្រោយពេលដែលគ្រោះរញ្ជួយដីធំបានកើតឡើង។ កម្រិតរញ្ជួយនឹងបន្តធ្លាក់ចុះ ប៉ុន្តែការរញ្ជួយដីផ្សេងទៀតរំពឹងថាអាចនឹងកើតមានឡើងក្នុងរយៈពេល ២៤ ម៉ោងនេះ ដូច្នេះផ្លូវធំៗមួយចំនួនគឺនៅបន្តបិទជាបណ្ដោះអាសន្នសិន៕
ប្រភព៖ Kenh14
