កាលពីដើមខែមិថុនាកន្លងទៅនេះ តារាសម្ដែងហុងកុង Don Li Yat Long បានធ្វើការប្រកាសដំណឹងដ៏គួរឱ្យភ្ញាក់ផ្អើលមួយប្រាប់អ្នកគាំទ្ររបស់លោកលើកម្មវិធី Douyin ថា លោកបានលាឈប់ពីវិស័យសិល្បៈហើយ។
ក្រោយមក កាលពីថ្ងៃទី ១០ ខែមិថុនា កន្លងទៅថ្មីៗនេះ លោកក៏បានបញ្ជាក់លើបណ្ដាញសង្គម Instagram ថែមទៀតថា៖ «ខ្ញុំខានថតរឿងកុនរយៈពេលប៉ុន្មានឆ្នាំដែរហើយ។ ខ្ញុំបានថតរឿងមួយចំនួនអំឡុងពេលផ្ទុះឆ្លងកូវីដ នេះបើតាមអ្វីដែលខ្ញុំចាំ ប៉ុន្តែរឿងទាំងនោះអត់ទាន់ឃើញបញ្ចាំងនៅឡើយទេ។ ឥលូវនេះខ្ញុំធ្វើតែអ្វីដែលល្អសម្រាប់ខ្លួនឯងប៉ុណ្ណោះ ហើយខ្ញុំសង្ឃឹមថាការសង្ស័យថាខ្ញុំបន្តលើវិថីសិល្បៈនេះគឺចប់ត្រឹមហ្នឹងទៅ។ ខ្ញុំគ្រាន់តែចង់បានជីវិតដែលមានសេរីភាព អាចផ្ដោតលើការងារដែលខ្ញុំចង់ធ្វើ ចំណាយពេលឱ្យបានច្រើនជាមួយគ្រួសារ ចេញដើរកម្សាន្តជាមួយមិត្តភក្តិជិតស្និទ្ធរបស់ខ្ញុំ និង មានពេលលំហែសម្រាក គឺគ្រប់គ្រាន់ហើយសម្រាប់ខ្ញុំ»។
គួរឱ្យដឹងថា តារាប្រុស Don ធ្លាប់ត្រូវបានអ្នកគាំទ្រផ្ទុះការវែកញែកកាលពីខែកុម្ភៈ ឆ្នាំ ២០២៥ កន្លងទៅ នៅពេលលោកឃើញកោរសក់គ្រងស្បង់ជាព្រះសង្ឃ ដោយក្រោយមកលោកបានចេញមកទម្លាយថា លោកបានបួសជាព្រះសង្ឃសិក្សាព្រះធម៌ជាបណ្ដោះអាសន្នក្នុងប្រទេសឥណ្ឌា។
គួររំឭកថា តារាសម្ដែងប្រុស Don បានចូលប្រឡូកវិស័យសិល្បៈដំបូងក្នុងឆ្នាំ ២០០៣។ លោកបានបង្ហាញវត្តមានក្នុងរឿងល្បីៗជាច្រើន ប៉ុន្តែរឿងដែលលោកទទួលបានការគាំទ្រ និង មានអ្នកស្គាល់ខ្លាំងនោះគឺរឿង «យុទ្ធសិល្ប៍បងប្អូនទាំង ១០»៕
ប្រភព៖ 8 Days
