លោក Takuma Tani អាយុ ៤៧ ឆ្នាំ ផ្ទុះប្រជាប្រិយភាពខ្លាំងជាមួយនឹងសំឡេងដ៏ពីរោះ រួមជាមួយនឹងការតុបតែងខ្លួនជាមនុស្សស្រីក្នុងម៉ូដ Lolita ដែលស័ក្ដិសមខ្លាំងបំផុត រហូតអ្នកដែលមិនស្គាល់លោកអាចលង់ស្រឡាញ់ដកចិត្តមិនរួច ព្រោះតែរូបសម្រស់ពេលតុបតែងគឺស្រស់ស្អាតខ្លាំងដូចកូនក្រមុំតុក្កតា។
រៀបរាប់ពីប្រវត្តិរបស់លោក Tani កាលចម្រើនវ័យបាន ៣ ឆ្នាំ លោកបានចាប់ផ្ដើមរៀនលេងព្យាណូ ដោយក្រោយមកក៏ចាប់សិក្សាផ្នែកបង្ហើរសំឡេងនៅក្រុង Liverpool ប្រទេសអង់គ្លេស បន្ទាប់មកក៏វិលត្រឡប់មកប្រទេសជប៉ុនវិញ ក្លាយខ្លួនជាគ្រូបង្វឹកផ្នែកសំឡេង។ ក្នុងឆ្នាំ ២០០៥ ក្រុមតន្ត្រីមួយឈ្មោះ Jikkendai Marmot ក៏ត្រូវបានបង្កើតឡើងក្នុងទីក្រុងតូក្យូ ដោយលោក Tani គឺជា lead singer ជាអ្នកសរសេរចម្រៀង និងជាអ្នកនិពន្ធទំនុកច្រៀង។
លោក Tani បានចាប់ផ្ដើមលេងស្ទីលតុបតែងខ្លួនក្នុងម៉ូដ Lolita ដំបូងនៅវ័យ ៣៤ ឆ្នាំ ខណៈពេលធ្វើការជាម៉ូដែលក្រៅម៉ោង។ នៅពេលនោះ មានពេលមួយ ម៉ូដែលស្រីម្នាក់បាន cancel ការងារ ហើយខាងបុគ្គលិកក៏បានសុំឱ្យលោក Tani ចូលមកជំនួសដោយស្លៀកឈុត Lolita។ ដំបូង លោករៀងស្ទាក់ស្ទើរដែរដោយគិតថាវាមិនស័ក្ដិសមសម្រាប់មនុស្សប្រុស និង ថែមទាំងជាឪពុកគេផង មកស្លៀកពាក់ធ្វើជាមនុស្សស្រីបែបនេះ ប៉ុន្តែចុងក្រោយលោកក៏យល់ព្រមធ្វើ។
យ៉ាងណាមិញ ការតុបតែងខ្លួនរបស់លោក Tani បានធ្វើឱ្យខាងបុគ្គលិកភ្ញាក់ផ្អើលជាខ្លាំងរហូតលាន់មាត់ថា រូបលោកគឺស៊ីកាមេរ៉ាខ្លាំងជាងម៉ូដែលស្រីទៅទៀត។ យូរៗទៅ លោក Tani ក៏កាន់តែមានភាពជឿជាក់ក្នុងការស្លៀកពាក់ឈុត Lolita នេះ ហើយការតុបតែងខ្លួនរបស់លោកនេះហើយបានជួយឱ្យលោកទទួលបានប្រជាប្រិយភាពខ្លាំងជាងមុន។
មនុស្សជាច្រើនបានកោតសរសើរចំពោះសំឡេង និង ការតុបតែងខ្លួនដ៏ស្រស់ស្អាតខ្លាំងរបស់លោក រហូតមានអ្នកខ្លះច្រណែនកូនៗរបស់លោកថែមទៀតដែលមានឪពុក Lolita ដ៏ខ្យូតជាងគេបំផុតលើពិភពលោកបែបនេះ។ ទោះជាយ៉ាងណាក៏ដោយ លោកក៏មានមនុស្សមួយចំនួនមិនពេញចិត្តផងដែរ ដោយពួកគេរិះគន់លោកថា មានរូបរាងមិនស័ក្ដិសមនឹងធ្វើជាឪពុកគេសោះ និង ថែមនិយាយថាបែបនេះកូនៗលោកនឹងត្រូវគេ bully យ៉ាងណាទេ៕
ប្រភព៖ SCMP
