ថ្មីៗនេះ លោកស្រីវេជ្ជបណ្ឌិត Lee Gil-ya អាយុ ៩៣ ឆ្នាំ ជានាយិកាប្រចាំមហាវិទ្យាល័យ Gachon កំពុងតែធ្វើឱ្យមានការផ្ទុះផ្អើលខ្លាំងពាសពេញបណ្ដាញសង្គម ក្រោយលោកស្រីបង្ហាញខ្លួនក្នុងវីដេអូមួយផ្សព្វផ្សាយពីសាលាដោយប្រធានបទនិយាយពាក់ព័ន្ធនឹង AI។
ក្នុងវីដេអូរបស់លោក Lee Gil-ya នេះដែរ មហាជនភាគច្រើនគឺមិនបានចាប់អារម្មណ៍ទៅលើសម្ដីដែលលោកស្រីកំពុងនិយាយនោះឡើយ ដោយពួកគេផ្ដោតសំខាន់ទៅលើរូបសម្រស់របស់លោកស្រីទៅវិញ ព្រោះថាសម្រស់លោកស្រីគឺស័ក្ដិសមនឹងវ័យទាល់តែសោះ។ ជាក់ស្ដែង មានអ្នកលេងបណ្ដាញសង្គមម្នាក់សរសេរដោយការភ្ញាក់ផ្អើលថា៖ «គាត់ប្រហែលជាមនុស្សវ័យ ៩៣ ឆ្នាំដែលមានរូបសម្រស់ក្មេងជាងគេបំផុតលើពិភពលោកហើយ»។
គួរឱ្យដឹងដែរថា នេះមិនមែនជាលើកទីមួយឡើយដែលលោកស្រី Gil-ya ត្រូវបានគេចាប់អារម្មណ៍ខ្លាំងលើរូបសម្រស់ដ៏ក្មេងជាងវ័យរបស់លោកស្រីនោះ។ ជាក់ស្ដែង កាលពីឆ្នាំ ២០២៣ កន្លងទៅ ក្នុងវ័យ ៩១ ឆ្នាំ លោកស្រីបានធ្វើឱ្យមនុស្សជាច្រើនភ្ញាក់ផ្អើលបើកភ្នែកធំៗ ក្រោយលោកស្រីបានធ្វើការសម្ដែងក្បាច់រាំជិះសេះដ៏ល្បីពីបទ «Gangnam Style» របស់តារាចម្រៀង Psy។
ចំពោះអាថ៌កំបាំងនៃភាពក្មេងជាងវ័យរបស់លោកស្រី Gil-ya ដែលជាវេជ្ជបណ្ឌិតម្នាក់ក្នុងចំណោមវេជ្ជបណ្ឌិតស្រីដំបូងគេរបស់ប្រទេសកូរ៉េខាងត្បូងរូបនេះ ក៏បានធ្វើការបើកបង្ហាញក្នុងកិច្ចសម្ភាសមួយជាមួយ Herald Business ផងដែរ។ លោកស្រី Gil-ya បាននិយាយថា លោកស្រីមិនពិសាគ្រឿងស្រវឹង និង ជក់បារីឡើយ ប្ដូរពីការញ៉ាំកាហ្វេមកញ៉ាំតែ និង រក្សាជាតិទឹកក្នុងខ្លួនដោយការផឹកទឹក ១.៥ លីត្រជារៀងរាល់ថ្ងៃ។
បន្ថែមពីនេះ លោកស្រីក៏ទៅទទួលការព្យាបាលបាញ់ឡាស៊ែជាប្រចាំនៅគ្លីនិកសើស្បែក និង តែងតែមានម៉ាស៊ីនបន្សុទ្ធខ្យល់ក្នុងបន្ទប់ជានិច្ច។ រឿងសំខាន់ចាំបាច់មួយទៀតនោះ លោកស្រីបានឱ្យដឹងថា ជៀសវាងការប្រើប្រាស់ថ្នាំជំនួយអារម្មណ៍ ហើយកុំស្ត្រេសច្រើន ទើបរូបសម្រស់មិនឆាប់ចាស់៕
ប្រភព៖ 8days
