ថ្មីៗកន្លងទៅ MrBeast ដែលជាមហាសេដ្ឋី youtuber ដ៏ល្បី មានទ្រព្យសម្បត្តិសរុបប្រមាណ ១ ពាន់លានដុល្លារ បានធ្វើឱ្យមហាជនជាច្រើនភ្ញាក់ផ្អើលជាខ្លាំង ក្រោយរូបលោកចេញមកអះអាងថា រូបលោកមានលុយតិចតួចណាស់ និង សូម្បីដែលលុយរៀបចំទុកការប្រពន្ធក៏ត្រូវទៅសុំខ្ចីពីម្ដាយសិនដែរ។
ការអះអាងខាងលើនេះដែរ MrBeast បានធ្វើការឆ្លើយតបនឹងការបង្ហោះមួយលើបណ្ដាញសង្គម X ដោយរូបលោកបានរៀបរាប់ថា៖ «ខ្ញុំខ្លួនឯងគឺមានលុយតិចតួចណាស់ ព្រោះតែខ្ញុំយកលុយវិនិយោគលើគ្រប់យ៉ាងវិញ (ខ្ញុំគិតថាឆ្នាំនេះ យើងនឹងចំណាយលុយមួយភាគបួននៃពាន់លានដុល្លារលើការផលិតមាតិកា)»។ លោកបានរៀបរាប់បន្ថែមទៀតថា៖ «និយាយដោយហួសចិត្តទៅ តាមពិតខ្ញុំបានខ្ចីលុយពីម្ដាយរបស់ខ្ញុំដើម្បីរៀបចំពិធីមង្គលការរបស់ខ្ញុំនាពេលខាងមុខនេះទៀតផង តែហ្នឹងហើយប្រាកដណាស់ នៅលើក្រដាស មុខជំនួញដែលខ្ញុំមានគឺមានតម្លៃច្រើនមែន»។
គួរបញ្ជាក់ថា MrBeast ដែលមានឈ្មោះពិតប្រាកដហៅថា Jimmy Donaldson គឺជាកំពូល youtuber ដ៏ល្បីមួយរូបដែលមានអ្នក subcribe ដល់ទៅជាង ៤០០ លាននាក់។ រូបលោកក៏ជាប់ឈ្មោះជាមហាសេដ្ឋីវ័យក្មេងវ័យក្រោម ៣០ ឆ្នាំ ដែលមានទ្រព្យសម្បត្តិដល់ពាន់លានដុល្លារ៕
