ថ្ងៃណាត់ជួបលើកដំបូង ប្រែក្លាយទៅថ្ងៃជាប់ខ្នោះ ដោយគូស្នេហ៏ចិត្តឆៅមួយគូ ស្គាល់គ្នាតាម app ណាត់ជួបមុខគ្នាលើកដំបូង ស្រាប់តែខាងប្រុសធ្វើស៊ីឱ្យដឹកទៅចូលប្លន់ធនាគារ។
ខាងប្រុសត្រូវគេស្គាល់ឈ្មោះថា Christopher Castillo កាលពីថ្មីៗកន្លងទៅនេះ បានរកឃើញថាពិតជាបានធ្វើសកម្មភាពប្លន់ ប្រើប្រាស់ហិង្សាលើប៉ូលិស។ ករណីបទល្មើសនោះដែរ បានកើតឡើងកាលពីថ្ងៃទី ០៥ ខែធ្នូ ឆ្នាំ ២០១៦ ត្រូវនឹងថ្ងៃណាត់ជួបគូស្នេហ៍លើកដំបូងរបស់គេ។
Castillo ត្រូវតុលាការកាត់ទោសឱ្យជាប់ពន្ធនាគារ ៣ ឆ្នាំ លើករណីប្លន់ និង ថែម ២ ឆ្នាំទៀតក្នុងមណ្ឌលកែប្រែ Bristol County House of Corrections លើករណីគេចពីការចាប់ខ្លួន និង ស្ដោះទឹកមាត់ដាក់ប៉ូលិស។
ដោយឡែក ចំពោះនារីជាគូស្នេហ៍វិញបានប្រាប់ប៉ូលិសពីដំណើររឿងថា ថ្ងៃនោះគឺជាថ្ងៃណាត់ជួបគ្នាដំបូង ហើយនាងក៏គ្មានហេតុផលត្រូវសង្ស័យអ្វីដែរ ពេលខាងប្រុសប្រាប់ឱ្យនាងឈប់ឡាននៅក្បែរធនាគារ។ ភ្លាមនោះ បុរសជាសង្សារក៏បានចេញពីឡានចូលទៅក្នុងធនាគារ ដោយទុកនាងចោលក្នុងឡានតែឯងរាប់សិបនាទី។
មួយសន្ទុះក្រោយមក ស្រាប់តែឃើញចេញមកវិញ ញើសជោគខ្លួន ពាក់វែនតាខ្មៅ ពាក់មួក ដៃកាន់កាំភ្លើង និង លុយប្រមាណ ១ ពាន់ដុល្លារក្នុងដៃ ស្រែកប្រាប់ឱ្យនាងបើកឡានចេញទៅ។ នាងភ័យផងស្លន់ផង ក៏ធ្វើតាមតែអ្វីដែលខាងប្រុសបានប្រាប់។ យ៉ាងណាមិញ ចុងក្រោយក៏ត្រូវអស់លក្ខណ៍ដោយសារប៉ូលិសកាក់ចាប់បាន៕
