កាលពីថ្ងៃទី ០៩ ខែកុម្ភៈ ឆ្នាំ ២០២៥ កន្លងទៅ កំពូលតារាចម្រៀងដ៏ល្បី Ed Sheeran បានធ្វើការប្រគំតន្ត្រីខ្នាតតូចមួយនៅដងផ្លូវ Church Street ក្នុងក្រុង Bengaluru ប្រទេសឥណ្ឌា ដែលបានទាក់ទាញមនុស្សជាច្រើនមកឈរទស្សនា។ យ៉ាងណាមិញ ការប្រគំតន្ត្រីធ្វើឡើងមិនបានប៉ុន្មានផង ស្រាប់តែមានប៉ូលិសម្នាក់ដើរមកឃាត់ហាមលែងឱ្យលោកច្រៀងតទៅទៀតដោយលើកហេតុផលថា Ed Sheeran មិនត្រូវបានអនុញ្ញាតឱ្យច្រៀងនៅទីនោះឡើយ។
តាមរយៈវីដេអូស្ដែងៗដែលថតបានដោយអ្នកចូលរួមទស្សនាម្នាក់ បានបង្ហាញឱ្យឃើញថាខណៈ Ed Sheeran កំពុងច្រៀងបទ «Shape of You» ក៏ស្រាប់តែមានប៉ូលិសប្រុសម្នាក់ដើរចូលមក ទាញខ្សែហ្គីតា និង មៃក្រូហ្វូនចេញ ធ្វើឱ្យការប្រគំតន្ត្រីត្រូវផ្អាកទាំងកណ្ដាលទី។ បើតាមការបញ្ជាក់ពីស្នងការរងនគរបាលប្រចាំតំបន់ Bengaluru លោក Shekhar H. Tekkannavar ប្រាប់ទៅកាន់សារព័ត៌មាន CNN បានឱ្យដឹងថា ខាងអាជ្ញាធរក្នុងតំបន់បានបដិសេធមិនអនុញ្ញាតឱ្យ Ed Sheeran សម្ដែងក្នុងតំបន់នោះឡើយ។ មានអ្នករាយការណ៍ម្នាក់បានរាយការណ៍ប្រាប់ប៉ូលិសពេលដែល Ed Sheeran ចាប់ផ្ដើមប្រគំតន្ត្រី។ លោក Shekhar H. Tekkannavar បានថ្លែងបញ្ជាក់ថា៖ «ពួកយើងមិនបានអនុញ្ញាតឱ្យគាត់សម្ដែងឡើយព្រោះផ្លូវ Church Street គឺជាផ្លូវដ៏មមាញឹកមួយ។ ពួកយើងគឺព្យាយាមចង់ឱ្យមនុស្សនៅតំបន់នោះផ្លាស់ទីធ្វើដំណើរបានដោយងាយស្រួល»។
យ៉ាងណាមិញ ក្នុងថ្ងៃទី ០៩ ខែកុម្ភៈ ឆ្នាំ ២០២៥ ដដែល លើបណ្ដាញសង្គម Instagram តារាចម្រៀង Ed Sheeran បានចេញមកបញ្ជាក់ដែរថា ការប្រគំតន្ត្រីតាមដងផ្លូវនោះគឺលោកទទួលបានការអនុញ្ញាតហើយ។ លោកបានរៀបរាប់ថា៖ «ពួកយើងទទួលបានការអនុញ្ញាត។ ការសម្ដែងគឺត្រូវបានរៀបចំទុកជាមុន មិនមែនពួកយើងបង្ហាញខ្លួនភ្លាមៗដោយអត់គ្រោងទុកនោះទេ»។
វីដេអូដែល Ed Sheeran ត្រូវប៉ូលិសឥណ្ឌាហាមឃាត់មិនឱ្យច្រៀងនេះផងដែរ ទទួលបានការចូលមើលរាប់លានដងលើបណ្ដាញសង្គម។ មហាជនមួយចំនួនបានចូលទៅបញ្ចេញមតិរិះគន់ចំពោះទង្វើរបស់ប៉ូលិសក្នុងវីដេអូ ដោយលើកឡើងថាសកម្មភាពរបស់តារាចម្រៀងរូបនេះគឺមិនបានធ្វើឱ្យមានបញ្ហាប៉ះពាល់អ្វីនោះឡើយ។ បន្ថែមពីនេះ ពួកគេក៏បានលើកឡើងទៀតថាខាងអាជ្ញាធរក្នុងតំបន់គួរតែផ្ដោតសំខាន់លើបញ្ហាកកស្ទះចរាចរណ៍ និង បញ្ហាកង្វះទឹកស្អាតប្រើប្រាស់ក្នុងក្រុងវិញទៅ។ ដោយឡែកក៏មានអ្នកនយោបាយម្នាក់បង្ហោះលើបណ្ដាញសង្គម X គាំទ្រលើចំណាត់ការរបស់ប៉ូលិស ដោយលោកលើកឡើងថា៖ «ទោះបីគេជាតារាលំដាប់អន្តរជាតិ ប៉ុន្តែពួកគេនៅតែត្រូវធ្វើតាមច្បាប់ក្នុងតំបន់ គ្មានការអនុញ្ញាតគឺគ្មានការសម្ដែងនោះឡើយ»៕
