ថ្មីៗនេះ វត្តមានសត្វត្រីរស់នៅបាតសមុទ្រដ៏កម្រ doomsday ឬត្រី oarfish ហែលទើរនៅលើឆ្នេរក្នុងភូមិ Playa Quemada នៃកោះ Canary ប្រទេសអេស្ប៉ាញ កំពុងទាក់ទាញមហាជនជាច្រើនឱ្យចាប់អារម្មណ៍ជាខ្លាំង។ វីដេអូដែលថតជាប់សកម្មភាពត្រីដ៏កម្រមួយនេះដែរ បានផ្ទុះការចែកចាយព្រោងព្រាតធ្វើឱ្យមនុស្សជាច្រើនកើតការងឿងឆ្ងល់ជាខ្លាំងថាមូលហេតុអ្វីបណ្ដាលឱ្យត្រីដែលធ្លាប់តែរស់នៅបាតសមុទ្រជ្រៅនេះឡើងមកផ្ទៃខាងលើបែបនេះ។
ត្រី doomsday ឬ ត្រី oarfish ជាត្រីសម្បូរឆ្អឹងដែលវែងជាងគេបំផុតលើពិភពលោកដោយវាអាចលូតលាស់បានរហូតដល់ប្រវែង ១៧ ម៉ែត្រ និង ទម្ងន់អាចមានដល់ជាង ២៧០ គីឡូក្រាម។ ជាធម្មតា ត្រីប្រភេទនេះរស់នៅតែក្នុងបាតសមុទ្រជម្រៅប្រមាណ ១០០០ ម៉ែត្រប៉ុណ្ណោះ ប៉ុន្តែពេលខ្លះវាអាចនឹងឡើងមកផ្ទៃទឹកខាងលើដោយសារតែចរន្តទឹកខ្លាំង ឬជួបប្រទះគ្រោះធម្មជាតិណាមួយ។
គួរឱ្យដឹងថា វត្តមានត្រី doomsday មកលើគោកគឺជាញឹកញាប់តែងត្រូវបានមនុស្សជឿជាក់ថាជាសញ្ញានៃការកើតមានគ្រោះធម្មជាតិឆាប់ៗ។ ជាក់ស្ដែង បើតាមជំនឿរបស់ពលរដ្ឋជប៉ុន ប្រសិនបើឃើញត្រីប្រភេទនេះងាប់បោកទើរមកលើគោកនៅតំបន់ណា នោះទីតាំងនោះនឹងជួបគ្រោះរញ្ជួយដីឆាប់ៗ ហើយការទាយទុកនេះដែរតែងតែកើតមានឡើងពិតប្រាកដមែន។
អ្នកវិទ្យាសាស្ត្រមួយចំនួនក៏ជឿដែរថាត្រីប្រភេទនេះគឺមានប្រតិកម្មខ្លាំងជាមួយនឹងចលនាមិនប្រក្រតីនៃភូមិសាស្ត្រព្រោះតែពួកវារស់នៅក្នុងទឹកជ្រៅ ប៉ុន្តែក៏នៅតែមិនមានការស្រាវជ្រាវណាបញ្ជាក់ថា ត្រីមួយប្រភេទនេះពិតជាអាចទាយដឹងនូវគ្រោះរញ្ជួយដីមែននោះដែរ។ បច្ចុប្បន្ន អ្នកជំនាញនៅបន្តតាមដាន និង វាយតម្លៃលើវត្តមាននៃត្រី oarfish ឡើងមកលើគោកនេះ ដើម្បីសិក្សាបន្ថែមពីការរស់នៅ និង ដែនជម្រករបស់ពួកវា៕
