តារារ៉េប និង ជាអ្នកច្នៃម៉ូដដ៏ល្បី Kanye West ថ្មីៗនេះបានចេញមកទម្លាយថា រូបលោកបានច្រឡំថាខ្លួនឯងកើតមានជំងឺ Bipolar តែឥលូវនេះទើបលោករកឃើញថាខ្លួនឯងគឺតាមពិតកើតមានជំងឺអូទីស្ស៊ឹម។
តាមសម្ដីរបស់ Kanye West បាននិយាយថា៖ «ប្រពន្ធរបស់ខ្ញុំ Bianca Censori ណែនាំឱ្យខ្ញុំទៅពិនិត្យខ្លួនឯងសាជាថ្មី ដោយនាងលើកឡើងថា អាកប្បកិរិយារបស់ខ្ញុំគឺមើលទៅមិនត្រូវគ្នានឹងរោគសញ្ញារបស់ជំងឺ Bipolar នោះឡើយ។ នាងធ្លាប់បានឃើញអ្នកកើតជំងឺ Bipolar ពីមុន ដូច្នេះខ្ញុំក៏ធ្វើតាមការណែនាំរបស់នាង ទៅពេទ្យពិនិត្យខ្លួនឯងជាថ្មីហើយក៏រកឃើញថាខ្ញុំកើតមានជំងឺអូទីស្ស៊ឹម»។
ការរកឃើញជំងឺដែលខ្លួនឯងកើតមាននេះដែរ Kanye West បាននិយាយថាវាជួយឱ្យលោកស្គាល់ពីអាកប្បកិរិយាខ្លួនឯងបានច្រើនជាងមុន ដូចកាលពីឆ្នាំ ២០១៨ នៅពេលដែលលោកពាក់មួក Make America Great Again ហើយលើកសរសើរដល់លោក Donald Trump រួមទាំងនិយាយថា៖ «មនុស្សប្រមូលផ្ដុំទាំងអស់នេះមិនអាចធ្វើឱ្យខ្ញុំឈប់ស្រឡាញ់ Trump បានឡើយ»។ Kanye បានរៀបរាប់ថា៖ «អូទីស្ស៊ឹមធ្វើឱ្យយើងធ្វើអ្វីមួយដូច Rain Man។ អ្នកពាក់មួករបស់ Trump ព្រោះតែអ្នកចូលចិត្ត Trump ហើយនៅពេលដែលមានមនុស្សមកប្រាប់អ្នកកុំឱ្យធ្វើវា អ្នកនឹងធ្វើវា ហ្នឹងហើយជាបញ្ហារបស់ខ្ញុំ។ នៅពេលអ្នកគាំទ្រប្រាប់ខ្ញុំកុំឱ្យធ្វើអាល់ប៊ុមបែបនេះ ខ្ញុំនឹងធ្វើបែបនោះ»។
តារារ៉េបរូបនេះបានបន្តទៀតថា៖ «ខ្ញុំលែងប្រើប្រាស់ថ្នាំចាប់តាំងពីខ្ញុំរកឃើញថាខ្ញុំមិនមែនកើតជំងឺ Bipolar»។ ក្រោយរកឃើញជំងឺខ្លួនឯងដែលកើតមានពិតប្រាកដ Kanye បាននិយាយថាលោកអាចដឹងថាពេលណាជំងឺវារើឡើង។ «ខ្ញុំតាមដានវាមុន ប៉ុន្តែមានពេលខ្លះនៅពេលដែលវាឈានដល់កម្រិតវាកើតមានឡើងតែម្ដង ខ្ញុំនឹងនៅជាប់គាំងនឹងជំងឺហ្នឹងមួយរយៈ វាអាចកើតឡើងពី ៣ ទៅ ៤ ថ្ងៃក្នុងមួយសប្ដាហ៍។ នៅពេលវាធ្វើទុក្ខខ្លាំង អារម្មណ៍របស់ខ្ញុំគឺមិនអាចគ្រប់គ្រងបាននោះឡើយ»៕
ប្រភព៖ Yahoo
