កាលពីព្រឹកថ្ងៃទី ០៣ ខែកុម្ភៈ ឆ្នាំ ២០២៥ កន្លងទៅ ក្រុមគ្រួសាររបស់តារាសម្ដែងស្រី Barbie Hsu រួមទាំងក្រុមហ៊ុនរបស់នាងបានចេញមកប្រកាសឱ្យមហាជនក៏ដូចជាអ្នកគាំទ្ររបស់នាងដឹងថា Barbie បានទទួលមរណភាពទៅហើយនៅប្រទេសជប៉ុនក្នុងវ័យ ៤៨ ឆ្នាំ ហើយចំពោះមូលហេតុនោះគឺបណ្ដាលមកពីការឆ្លងរោគផ្ដាសាយឈានដល់ការរលាកសួតធ្ងន់ធ្ងរ។ ដំណឹងមរណភាពភ្លាមៗរបស់កំពូលតារាស្រីនៅតៃវ៉ាន់រូបនេះ បានធ្វើឱ្យមហាជនជាច្រើនមានការតក់ស្លុត និង សោកស្ដាយជាខ្លាំង។
នៅយប់ថ្ងៃទី ០៣ ខែកុម្ភៈ ឆ្នាំ ២០២៥ ដដែលនោះ តារាសម្ដែងប្រុស Jerry Yan ដែលជាដៃគូសម្ដែងរបស់ Barbie Hsu ក្នុងរឿង «Meteor Garden» ក៏បានចេញមុខធ្វើការបង្ហោះលើបណ្ដាញសង្គម Weibo រៀបរាប់សារដ៏រំជួលចិត្តធ្វើការលាគ្នាជាលើកចុងក្រោយក្នុងនាមជាដៃគូចាស់ជាមួយគ្នា។
តាមរយៈសារដែលបានបង្ហោះនោះដែរ តួអង្គ តាវ មីងស៊ឺរូបនេះបានសរសេររៀបរាប់ថា៖ «អរគុណដែលបានជួបនាងក្នុងអំឡុងពេលជីវិតរបស់នាងប្រៀបដូចជាក្មេងដែលគ្មានទុក្ខកង្វល់។ នាងតែងតែនិយាយថា ចាយជីវិតរាល់ថ្ងៃឱ្យដូចជាថ្ងៃចុងក្រោយរបស់នាង។ ខ្ញុំសង្ឃឹមថាលើកនេះនាងនឹងធ្វើដំណើរយឺតៗ ហើយចាប់ពីពេលនេះទៅនៅពិភពថ្មីមួយទៀត នាងនឹងគ្មានជួបបញ្ហាអ្វីទាំងអស់ ហើយពេលវេលារបស់នាងនឹងពោរពេញដោយសន្តិភាពបំផុត»។
គួររំឭកថា តារាសម្ដែង Barbie Hsu និង Jerry Yan បានក្លាយជាដៃគូសម្ដែងដ៏ស័ក្ដិសម និង ផ្ទុះប្រជាប្រិយភាពបំផុត អំឡុងពេលពួកគេចាប់ដៃគ្នាសម្ដែងក្នុងរឿង «Meteor Garden» ក្នុងនាមជាតួអង្គឯកប្រុសស្រី តាវ មីងស៊ឺ និង សាន់ ឆាយ ក្នុងឆ្នាំ ២០០១។ ខ្សែភាពយន្តភាគមួយនេះល្បីសុសសាយខ្លាំងមែនទែន រហូតមានបណ្ដាប្រទេសជាច្រើនទិញសិទ្ធិថតជា version ប្រចាំប្រទេសរៀងៗខ្លួនផងដែរ៕
