លោក Jiao Zi អ្នកនិពន្ធ និង ជាអ្នកដឹកនាំរឿងតុក្កតាដ៏ល្បី «ណាចា ២» ជ្រើសរើសសម្ងំលាក់ខ្លួន និង មិនព្រមទទួលការសម្ភាសនានាទាំងអស់ ដើម្បីលោកអាចផ្ដោតផ្ងង់អារម្មណ៍ផលិតស្រឡាយរឿងភាគទី ៣ ឱ្យបានល្អ។
រយៈពេលប្រមាណជិត ៣ ខែមកហើយដោយរឿងតុក្កតា «Nezha 2» បានចាក់បញ្ចាំងផ្សាយក្នុងរោងកុននានាពាសពេញបណ្ដាប្រទេសនៅអាស៊ី នៅអឺរ៉ុប និង អាមេរិក។ ចាប់តាំងពីចាក់បញ្ចាំងមក រឿងមួយនេះដែរនៅតែមានប្រជាប្រិយភាពខ្លាំងមិនថមថយរហូតមានអ្នកលើកយកនិយាយជាហូរហែ។ យ៉ាងណាមិញ ទោះជារឿងផ្ទុះខ្លាំងដល់កម្រិតណាក៏ដោយ លោក Jiao Zi ដែលជាអ្នកដឹកនាំរឿងគឺមិនដែលបង្ហាញខ្លួន ឬនិយាយពាក្យពេចន៍មួយចំនួនពាក់ព័ន្ធនឹងការងារ ឬជីវិតរបស់លោកនោះឡើយ ពោលគឺលោកសម្ងំលាក់ខ្លួនតែម្ដងដោយសូម្បីតែបណ្ដាញសង្គមក៏មានសកម្មភាពអ្វីនោះដែរ។
តាមទូរទស្សន៍ជាតិចិន CCTV បានឱ្យដឹងថា កាលពីថ្ងៃទី ២៧ ខែមេសា ឆ្នាំ ២០២៥ កន្លងទៅ រឿង «ណាចា ២» បានឈ្នះពានរង្វាន់ Special Contribution Film នៅកម្មវិធី Huabiao Awards ប៉ុន្តែពេលនោះគឺមិនមានឃើញវត្តមានរបស់លោក Jiao Zi ចូលរួមទទួលពានរង្វាន់នោះឡើយ ដោយលោកឱ្យផលិតករ Wang Chantian ទទួលជំនួស។ គួរឱ្យដឹងថា កម្មវិធីពានរង្វាន់ Huabiao គឺជាកម្មវិធីមួយក្នុងចំណោមកម្មវិធីពានរង្វាន់ដ៏ចំណាស់ និង ធំជាងគេបំផុតទាំង ៣ នៅក្នុងឧស្សាហកម្មភាពយន្តចិន។
លោក Wang បានទម្លាយថា លោក Jiao Zi គឺកំពុងរស់នៅជាមួយសម្ពាធខ្លាំងក្នុងការផលិតរឿងណាចាភាគទី ៣។ លោកជ្រើសរើសផ្ដាច់ខ្លួនពីគេមិនចង់ ឬចូលរួមកម្មវិធីនានា រហូតទាល់តែការផលិតភាគទី ៣ ត្រូវបានបញ្ចប់រួចរាល់។ លោក Wang រួមទាំងក្រុមការងារដទៃទៀតគឺគោរពការតាំងចិត្តផ្ដោតអារម្មណ៍រុករកភាពច្នៃប្រឌិតដើម្បីផលិតរឿងរបស់លោក Jiao Zi ជាខ្លាំង ហើយពួកគេក៏គាំទ្រការសម្រេចចិត្តរបស់អ្នកដឹកនាំរឿងរូបនេះផងដែរ។
Jiao Zi ដែលមានឈ្មោះពិតហៅថា Yang Yu បានកើតក្នុងឆ្នាំ ១៩៨០ ជាអ្នកខេត្ត Sichuan ប្រទេសចិន។ លោកបានបញ្ចប់ការសិក្សាផ្នែក Pharmacy ពីមហាវិទ្យាល័យ Sichuan។ ចាប់តាំងពីរៀងបានឆ្នាំទី ៣ នៅមហាវិទ្យាល័យមក លោក Jiao Zi តែងតែរៀនផលិតតុក្កតា animate ដោយខ្លួនឯង ដែលដំបូងៗមានមនុស្សជាច្រើនសើចចំអកលោកថា ជាមនុស្សដេកស្រមៃ រស់នៅតែជាមួយរឿងប្រឌិត។
Jiao Zi រស់នៅឆ្លងកាត់ការលំបាកជាច្រើនក្នុងជីវិត លោកគ្មានការងារជាប់លាប់រាប់ឆ្នាំ ហ៊ានទិញអាហារតែអាហារគេបញ្ចុះតម្លៃក្នុងផ្សារទំនើប និង មិនអាចសូម្បីតែទិញសម្លៀកបំពាក់ថ្មីឱ្យខ្លួនឯង។ ក្រោយឪពុកលោកចែកឋានទៅ ម្ដាយរបស់លោករកប្រាក់បានត្រឹមតែប្រមាណ ១៣៧ ដុល្លារក្នុងមួយខែ ប៉ុន្តែគាត់នៅតែតស៊ូជំរុញកូនប្រុសឱ្យដើរតាមក្ដីស្រមៃដោយជឿជាក់លើកូនថានឹងអាចផ្គត់ផ្គង់ជីវិតជាមួយនឹងការងាររបស់គេបាន។
ក្នុងឆ្នាំ ២០០៨ Jiao Zi បានភ្លក់ភាពជោគជ័យរបស់ខ្លួនជាលើកដំបូងជាមួយភាពយន្ត animated ខ្លីរបស់ខ្លួនដោយបានឈ្នះពានរង្វាន់រហូតទៅដល់ជាង ៣០ ពាន ហើយជាមួយរឿង «ណាចា» ទាំង ២ ភាគដែលបានផលិតមកនេះ Jiao Zi គឺអាចយកឈ្នះផលិតករជើងចាស់ ក្លាយជាអ្នកដឹកនាំរឿងចិនដ៏ជោគជ័យបំផុតនៅ box office៕
