រឿងរ៉ាវរបស់បុរសវ័យកណ្ដាលជនជាតិចិនម្នាក់ដែលក្លែងបន្លំខ្លួនជាមនុស្សស្រីដើម្បីល្បួងប្រុសៗជាង ១ ពាន់នាក់រួមភេទ និង លួចថតវីដេអូស្ងាត់ៗ កំពុងតែផ្ទុះផ្អើលយ៉ាងក្ដៅគគុកពាសពេញបណ្ដាញសង្គមក្នុងប្រទេសចិន បង្កឱ្យកាន់តែមានការភ័យខ្លាចចំពោះសុខភាពសាធារណៈ ភាពជាឯកជន និង ភាពស្មោះត្រង់ក្នុងចំណងអាពាហ៍ពិពាហ៍។
Hash tag «red uncle» គឺកំពុងស្ថិតលើ top កំពូល trending លើបណ្ដាញសង្គមចិន Weibo តាំងពីថ្ងៃទី ៨ ខែកក្កដា ឆ្នាំ ២០២៥ កន្លងមក ទាក់ទាញអ្នកចូលមើលយ៉ាងហោចណាស់ ២០០ លានដង ខណៈអ្នកប្រើប្រាស់បណ្ដាញសង្គមបង្ហាញអារម្មណ៍មិនចង់ជឿ និង តក់ស្លុត។
តាមការបង្ហោះលើបណ្ដាញសង្គមចិននោះបានរៀបរាប់ពីបុរសម្នាក់នៅភាគខាងកើតក្រុង Nanjing ប្រទេសចិន បានល្បួងមនុស្សប្រុសស្រឡាញ់ភេទដូចគ្នាចំនួន ១៦៩១ នាក់ ឱ្យទៅផ្ទះរបស់ខ្លួនដើម្បីរួមភេទ ទាំងដែលមិនដឹងថាស្ត្រីក្លែងក្លាយរូបនោះបានលួចថតវីដេអូ និង បង្ហោះចែកចាយតាមប្រព័ន្ធអនឡាញ។
វីដេអូចែកចាយទាំងនោះត្រូវបានបញ្ជាក់ប្រាប់ដោយប៉ូលិសស្រុក នៅ Nanjing ក្នុងសេចក្ដីថ្លែងការណ៍មួយកាលពីថ្ងៃទី ០៨ ខែកក្កដា។ ពួកគេបានលើកឡើងថា បុរសតុបតែងខ្លួនជាមនុស្សស្រីរូបនោះមានត្រកូល Jiao ត្រូវបានប៉ូលិសចាប់ខ្លួនកាលពីថ្ងៃទី ៦ ខែកក្កដា ឆ្នាំ ២០២៥ កន្លងទៅ ពាក់ព័ន្ធនឹងបទចែកចាយវីដេអូអាសអាភាស។
យ៉ាងណាមិញ ប៉ូលិសបានបញ្ជាក់ទៀតថា ស្ត្រីក្លែងក្លាយឈ្មោះ Jiao រូបនេះ គឺមានវ័យ ៣៨ ឆ្នាំ មិនមែន ៦០ ឆ្នាំដូចដែលការបង្ហោះលើបណ្ដាញសង្គមនោះឡើយ។ ប៉ូលិសក៏បានបដិសេធដែរថា Jiao គឺមិនបានរួមភេទជាមួយមនុស្សប្រុសដល់ជាង ១ ពាន់នាក់នោះឡើយ ប៉ុន្តែចំនួនពិតប្រាកដប៉ុន្មាននោះគឺខាងប៉ូលិសមិនបានទម្លាយឡើយ។
ប្រភព៖ Reuters
