ហាងកាហ្វេមួយកន្លែងនៅក្នុងប្រទេសចិន កំពុងផ្ទុះទាក់ទាញចំណាប់អារម្មណ៍ខ្លាំងពីមហាជន ក្រោយកើតមានគំនិតច្នៃមុខមីនុយថ្មី «កាហ្វេផាក់ឡូវពោះវៀនជ្រូក» ដោយក្នុងមួយកែវលក់ក្នុងតម្លៃ ៣២ យ័ន (ប្រមាណ ៤ ដុល្លារ)។ តាមសារព័ត៌មាន SCMP បានចេញផ្សាយថា កាហ្វេរសជាតិថ្មីនេះដែរ ច្នៃមកមានរសជាតិ ៣ កម្រិត (ស្រាល ល្មម និង ចាស់) ដោយកម្រិតនីមួយៗធ្វើឡើងទៅតាមរសជាតិសារធាតុរាវក្នុងពោះវៀនជ្រូកដែលលាយចូលកាហ្វេ។
ហាងកាហ្វេខាងលើនេះដែរ មានទីតាំងនៅក្នុងក្រុងតូចមួយនៃខេត្ត Sichuan ប្រទេសចិន ដោយមីនុយកាហ្វេផាក់ឡូវពោះវៀនជ្រូកនេះ គឺជាកាហ្វេឡាតេក្រឡុកបញ្ចូលគ្នាជាមួយនឹងសារធាតុរាវក្នុងពោះវៀនជ្រូក អមលម្អថែមដោយផាក់ឡូវពោះវៀនជ្រូកមួយចង្កាក់ដាក់ពីលើ។ តាមសម្ដីរបស់ម្ចាស់ហាងកាហ្វេ ពោះវៀនជ្រូកគឺយកពីភោជនីយដ្ឋាមល្បីឈ្មោះមួយក្នុងតំបន់ ហើយសារធាតុពីគ្រឿងក្នុងនេះយកមកលាយជាមួយនឹងកាហ្វេឡាតេ គឺធ្វើឱ្យកាហ្វេមានរសជាតិផ្អែមផងប្រៃផងដោយរសជាតិលោកប្រដូចទៅនឹង ឈីសប្រៃ។
មុខមីនុយកាហ្វេប្រភេទថ្មីនេះដែរ បានផ្ទុះល្បីតាមបណ្ដាញសង្គមខ្លាំងតាំងពីដើមខែមិថុនាមកម្ល៉េះ ដោយភ្ញៀវមកហាង ៨០% ហើយបានសាករសជាតិថ្មីនេះ ធ្វើឱ្យការលក់ក្នុងហាងកើនរហូតគុណនឹង ៤ ដងឯណោះ៕
ប្រភព៖ World Of Buzz
