ជាការពិតណាស់ កាលពីខែមីនា ឆ្នាំ ២០២៥ កន្លងទៅ ខ្សែភាពយន្ត live-action លំនាំរឿងតុក្កតាដ៏ល្បីរបស់ Disney រឿង «Snow White» ដែលមានតារាសម្ដែងស្រី Rachel Zegler ជាតួឯកស្រី បានដាក់ចាក់បញ្ចាំងជាផ្លូវការនៅតាមគ្រប់រោងភាពយន្តទាំងអស់។
យ៉ាងណាមិញ តាំងពីមិនទាន់ចាក់បញ្ចាំងជាផ្លូវការរហូតដល់ការចាក់បញ្ចាំងតាមរោងភាពយន្ត រឿងមួយនេះគឺមិនទទួលបានមតិគាំទ្រច្រើននោះឡើយតែបែរទទួលរងការរិះគន់មិនពេញចិត្តយ៉ាងខ្លាំងក្លាទៅវិញ ជាពិសេសនោះគឺការរិះគន់ទៅលើតួឯកស្រីតែម្ដង ដោយភាគច្រើនមិនសប្បាយចិត្តថានាង Rachel គឺមិនស័ក្ដិសមក្នុងការជ្រើសឱ្យសម្ដែងជាតួអង្គព្រះនាងព្រិលសឡើយ បូករួមជាមួយមតិរិះគន់ខ្លាំងជាច្រើនទៀត។
ដោយឡែក ថ្មីៗកន្លងទៅនេះ តារាស្រី Rachel Zegler បានធ្វើឱ្យមហាជនជាច្រើនចាប់អារម្មណ៍ខណៈរូបនាងផ្ដល់កិច្ចសម្ភាសមួយជាមួយទស្សនាវដ្តី iD ដោយទម្លាយថារូបនាងបានស្វែងរកការជួយប្រឹក្សាពីអ្នកជំនាញផ្លូវចិត្តដើម្បីព្យាបាលបញ្ហាសម្ពាធដែលនាងទទួលរងពីមតិរិះគន់រឿង «Snow White»។
Rachel បានចែករំលែកថា ការចូលរួមប្រឹក្សាពីអ្នកជំនាញផ្នែកផ្លូវចិត្តគឺបានជួយនាងច្រើនមែនទែនក្នុងការជម្នះលើផលប៉ះទង្គិចផ្លូវចិត្តពីមតិមិនល្អ ហើយក៏បានជួយឱ្យនាងយល់ដឹងកាន់តែច្បាស់ពីខ្លួនឯង និង អាជីពមួយនេះផងដែរ។ តារាសម្ដែងស្រីវ័យ ២៤ ឆ្នាំរូបនេះបានរៀបរាប់ថា៖ «ខ្ញុំគិតថា ភាពជាជនរងគ្រោះគឺជាជម្រើស ហើយខ្ញុំគឺមិនជ្រើសវានោះឡើយ។ ខ្ញុំជ្រើសយកភាពវិជ្ជមាន ភាពមានពន្លឺ និង ក្ដីសុខ ហើយពេលខ្លះខ្ញុំជឿថាក្ដីសុខក៏ជាជម្រើសដែរ ដោយរាល់ថ្ងៃខ្ញុំភ្ញាក់ឡើងខ្ញុំគិតថា ខ្ញុំពិតជាសំណាងណាស់ដែលខ្ញុំរស់នៅជីវិតដែលខ្ញុំកំពុងរស់នៅពេលនេះ»៕
