រឿងរ៉ាវរបស់នារីម្នាក់នៅប្រទេសចិនបានធ្វើឱ្យមហាជនជាច្រើនផ្ទុះការចាប់អារម្មណ៍ ដោយសារតែនាងបានទៅណាត់ជួបគូស្នេហ៍ញ៉ាំអាហារពេលល្ងាចជាមួយគ្នាលើកដំបូង ដោយនាំយកសាច់ញាតិផៅ ២៣ នាក់ទៅជាមួយ ក្នុងបំណងសាកល្បងមើលទឹកចិត្តខាងប្រុស។ យ៉ាងណាមិញ ការសាកល្បងមួយនេះបែរជាធ្វើឱ្យនាងទទួលបានបទពិសោធមួយសឹងរៀងចាលមួយជីវិត។
តាមការចេញផ្សាយរបស់សារព័ត៌មានក្នុងប្រទេសចិន បុរសម្នាក់ឈ្មោះ Liu បានណាត់ជួបគូស្នេហ៍ឈ្មោះ Zhang ដែលមេអណ្ដើកផ្សំផ្គុំឱ្យ នៅភោជនីយដ្ឋានល្បីមួយកន្លែងក្នុងខេត្ត Jilin។ រំពឹងថាការណាត់ជួបមានភាពរលូនពោរពេញដោយភាពផ្អែមល្ហែម តែលោក Liu បែរជាទទួលបានការភ្ញាក់ផ្អើលនិយាយលែងចេញ ក្រោយឃើញគូស្នេហ៍ blind date ឈ្មោះ Zhang មិនមែនមកជួបលោកតែម្នាក់ឯង តែបែរជានាំសាច់ញាតិដល់ទៅ ២៣ នាក់មកជាមួយដែរ។
ការណាត់ជួបគូស្នេហ៍បែបឯកជនតែ ២ នាក់ បែរប្រែក្លាយជាតុមូលដូចពិធីជប់លៀង ហើយអ្វីកាន់តែហួសចិត្តពេលញ៉ាំអាហារពេលល្ងាចចប់ បុងលុយក៏ធ្លាក់មកអស់រហូតដល់ជិត ២ ម៉ឺនយ័ន (ប្រមាណ ២៨១២ ដុល្លារ) ដែលធ្វើឱ្យលោក Liu ខកចិត្តជាខ្លាំង និង សម្រេចដើរចេញពីហាង ទុកឱ្យនាង Zhang និង សាច់ញាតិចេញលុយថ្លៃអាហារដោយខ្លួនឯង។
នាង Zhang បានទាមទារឱ្យលោក Liu ចេញថ្លៃអាហារពាក់កណ្ដាល តែចុងបញ្ចប់លោកឱ្យនាងត្រឹម ៤ ពាន់យ័នប៉ុណ្ណោះ ដោយទុកឱ្យនាងដើរប្រមូលលុយពីបងប្អូនចេញថ្លៃដែលនៅសល់។ ថ្លែងប្រាប់សារព័ត៌មានក្នុងស្រុក Zhang បានរៀបរាប់ថា នាងនាំសាច់ញាតិគ្រួសារមកជាមួយដើម្បីពិសោធមើលទឹកចិត្តខាងប្រុស មុនឈានដល់ការទាក់ទងគ្នាផ្លូវការ។ ដោយឡែក ងាកទៅខាងសាច់ញាតិរបស់ Zhang វិញ ឃើញខាងប្រុសធ្វើទង្វើបែបនេះបែរជាកើតការខឹងសម្បាទៅដាក់ពាក្យប្ដឹងទាមទារឱ្យខាងប្រុសមកចេញរ៉ាប់រងថ្លៃអាហារទាំងអស់វិញ។ យ៉ាងណាមិញ បណ្ដឹងមួយនេះគឺទៅមិនរួច ដោយតុលាការកាត់ក្ដីយល់ស្របតាម Liu ដោយឱ្យលោកចេញថ្លៃអាហារត្រឹមចំណែករបស់លោក និង Zhang ញ៉ាំប៉ុណ្ណោះ ចំពោះសាច់ញាតិគឺចេញដោយខ្លួនឯង៕
