ជាការពិតណាស់ វត្តមានរបស់បញ្ញាសិប្បនិម្មិត ឬហៅកាត់ថា AI មិនត្រឹមតែផ្ដល់ផលវិជ្ជមានងាយស្រួលដល់មនុស្សនោះទេ ប៉ុន្តែវាក៏បានជះឥទ្ធិពលមិនល្អដល់មនុស្សមួយចំនួនដែលមានការយល់ដឹងតិចតួចពីវាផងដែរ ជាពិសេសមនុស្សមានវ័យចំណាស់ៗ។ ជាក់ស្ដែង ថ្មីៗនេះ បុរសវ័យចំណាស់ម្នាក់ក្នុងប្រទេសចិន បានសុំប្រពន្ធរបស់គាត់លែងលះគ្នា ក្រោយគាត់កើតមានអារម្មណ៍ទាក់ចិត្តលង់ស្រឡាញ់ស្ត្រី AI ម្នាក់ដែលគាត់បានឃើញតាមបណ្ដាញសង្គមអនឡាញ។
បុរសរូបនោះមានវ័យ ៧៥ ឆ្នាំ ត្រូវបានគេស្គាល់ឈ្មោះថា Jiang ដោយរូបគាត់បានលង់នឹងសម្ដីផ្អែមល្ហែមរបស់នារី AI រហូតដកចិត្តលែងរួច បើទោះជាចលនាបបូរមាត់របស់នារីរូបនោះមិនស៊ីគ្នានឹងសំឡេងក៏ដោយ។ គាត់ជឿរាល់ពាក្យសម្ដីនារី AI និយាយមកកាន់គាត់ រហូតញៀនឆែកទូរស័ព្ទរាល់ថ្ងៃរង់ចាំការឆ្លើយតបពីភាគម្ខាងទៀតដែលមិនមែនជាមនុស្សពិតនោះ។
គួរឱ្យដឹងថា លោកតា Jiang មិនមែនជាបុគ្គលដំបូងដែលកើតមានអារម្មណ៍មនោសញ្ចេតនាលើកម្មវិធី AI ប៉ុណ្ណោះទេ។ មែនទែនទៅ មាតិកាដែលធ្វើឡើងដោយ AI គឺផ្ទុះផ្អើលខ្លាំងមែនទែនក្នុងប្រទេសចិន ធ្វើឱ្យមនុស្សចាស់ជាច្រើនជាពិសេសអ្នកដែលមានចំណេះដឹងតិចតួចលើរឿងបច្ចេកវិទ្យានេះគឺទាក់ចិត្តនឹងមាតិកាបែបនេះជាខ្លាំង។ ភាគច្រើនបើទោះជាកូនៗរបស់ពួកគាត់ប្រាប់ហើយប្រាប់ទៀតថាមាតិកាទាំងនោះគឺក្លែងក្លាយមិនមែនការពិតទេ តែពួកគាត់នៅតែលង់ជឿថានោះជាការពិតដដែល៕
ប្រភព៖ World Of Buzz
