តាមការចេញផ្សាយពីទីភ្នាក់ងារសារព័ត៌មានជាតិរបស់រុស្ស៊ី RIA Novosti បានឱ្យដឹងថា ភ្នំភ្លើងខ្ពស់ជាងគេបំផុតនៅអឺរ៉ុប និង អាស៊ី បានផ្ទុះជះភ្លើង និង ផេះខ្មួលខ្មាញ់ឡើងលើអាកាស ក្រោយការកើតមានគ្រោះរញ្ជួយដីកំណាចកម្រិត ៨.៨ រ៉ិចទ័រនៅតំបន់ Kamchatka នាចុងបូព៌ាប្រទេសរុស្ស៊ី។
ភ្នំភ្លើង Klyuchevskaya Sopka ជាភ្នំភ្លើងសកម្មខ្ពស់ជាងគេបំផុតមួយលើពិភពលោកជាមួយរយៈកម្ពស់ ៤៧៥០ ម៉ែត្រ។ ភ្នំភ្លើងនេះដែរស្ថិតនៅជួរនៃចិញ្ចៀនភ្លើងប៉ាស៊ីហ្វិក ដោយសកម្មភាពផ្ទុះគឺតែងតែកត់ត្រាបានជាប្រចាំ។ បច្ចុប្បន្ន មិនមានព័ត៌មានណាបញ្ជាក់ពីការខូចខាតដែលបង្កដោយបន្ទុះភ្នំភ្លើងនេះឡើយ ប៉ុន្តែខាងអាជ្ញាធរគឺនៅបន្តតាមដានយ៉ាងជិតដិតបំផុតអំពីការវិវឌ្ឍរបស់ភ្នំភ្លើងនេះបន្តទៀត និង ប្រកាសប្រាប់ពលរដ្ឋក៏ដូចជាអ្នកទេសចរទាំងអស់ឱ្យនៅឆ្ងាយពីតំបន់គ្រោះថ្នាក់។
ដោយឡែក ចំពោះការ update ពីករណីគ្រោះរញ្ជួយដី និង ស៊ូណាមិ ក្នុងប្រទេសរុស្ស៊ីវិញ ខាង Kremlin បានបញ្ជាក់ថា មកទល់ពេលនេះគឺគ្មានអ្នកស្លាប់ ឬរបួសឡើយ៕
