ឥទ្ធិពលគ្រោះធម្មជាតិ! ចំនួនអ្នកស្លា./ប់ដោយគ្រោះរញ្ជួយដីក្នុងប្រទេសអាហ្វហ្គានីស្ថាន កើនឡើងដល់ជាង ២២០០ នាក់ហើយ

តាមការបញ្ជាក់ពីខាងរដ្ឋាភិបាលតាលីបង់បានឱ្យដឹងថា ចំនួនករណីស្លាប់ដោយសារគ្រោះរញ្ជួយដីនៅភាគខាងកើតប្រទេសអាហ្វហ្គានីស្ថាន បានកើនឡើងរហូតដល់ជាង ២២០០ នាក់ហើយ ដោយចំនួនអ្នកស្លាប់អាចនឹងនៅបន្តកើនឡើងថែមទៀត។

Hamdullah Fitrat អ្នកនាំពាក្យរងរដ្ឋាភិបាលតាលីបង់ បានថ្លែងបញ្ជាក់កាលពីថ្ងៃទី ០៤ ខែកញ្ញា ឆ្នាំ ២០២៥ កន្លងទៅថា មនុស្សចំនួន ២២០៥ នាក់បានស្លាប់ និង ៣៦៤០ នាក់ទៀតបានរងរបួស ដោយសារគ្រោះរញ្ជួយដីវាយប្រហារខេត្ត Kunar ក្បែរព្រំប្រទល់ជាប់ប្រទេសប៉ាគីស្ថាន។ ជាមួយគ្នានោះដែរ នៅខេត្តក្បែរខាង Nangarhar និង Laghman ក៏មានសេចក្ដីរាយការណ៍ថាមានអ្នកស្លាប់ចំនួន ១២ នាក់ និង រាប់រយនាក់ផ្សេងទៀតរងរបួសផងដែរ។ បច្ចុប្បន្ន ខាងក្រុមសង្គ្រោះកំពុងនៅបន្តស្វះស្វែងរុករកជនរងគ្រោះនៅឡើយ។

គួរឱ្យដឹងថា បើតាមទីភ្នាក់ងារវាស់ស្ទង់ភូមិសាស្ត្ររបស់អាមេរិក (USGS) បានកត់ត្រាគ្រោះរញ្ជួយដីមួយកម្រិត ៦ រ៉ិចទ័រ បានកើតឡើងជិតពាក់កណ្ដាលយប់ថ្ងៃទី ៣១ ខែសីហា ឆ្នាំ ២០២៥ កន្លងទៅ ដោយចំណុចកណ្ដាលមានជម្រៅ ៨ គីឡូម៉ែត្រ ចម្ងាយប្រមាណ ២៧ គីឡូម៉ែត្រពីក្រុង Jalalabad ខេត្ត Nangarhar៕