នារីជាអ្នកផលិតមាតិកាជនជាតិកូរ៉េខាងត្បូងម្នាក់ មានចំនួនអ្នកតាមដានប្រមាណ ៩ ម៉ឺននាក់ ថ្មីៗនេះ បានធ្វើដំណើរកម្សាន្តទៅប្រទេសម៉ុងហ្គោលី ហើយក៏បានទៅឡើងលេងភ្នំភ្លើងដ៏ទាក់ទាញមួយនៅទីនោះ។
យ៉ាងណាមិញ ភាពរីករាយប្រែក្លាយជារឿងសោកសៅបំផុត ដោយខណៈពេលដែលនាងថតរូប និង វីដេអូលើកំពូលភ្នភ្លើងនោះ ក៏ស្រាប់តែត្រូវកម្លាំងខ្យល់បោកបក់ខ្លាំង បោកទម្លាក់នាងចូលជ្រលងភ្នំភ្លើងរហូតបាត់បង់ជីវិតនៅនឹងកន្លែង នេះបើតាមការបញ្ជាក់ពីក្រសួងការបរទេសប្រចាំប្រទេសកូរ៉េ កាលពីថ្ងៃទី ០៧ ខែកញ្ញា ឆ្នាំ ២០២៥ កន្លងទៅនេះ។
តាមសារព័ត៌មានកូរ៉េបានឱ្យដឹងថា ហេតុការណ៍គ្រោះថ្នាក់នេះដែរបានកើតឡើងកាលពីថ្ងៃទី ១៨ ខែសីហា ឆ្នាំ ២០២៥ កន្លងទៅ ខណៈពេលដែលអ្នកផលិតមាតិកាវ័យខ្ទង់ ២០ ឆ្នាំខាងលើ កំពុងថតរូប និង វីដេអូលេងនៅលើកំពូលភ្នំភ្លើង Uran Togoo នាខេត្ត Bulgan ភាគខាងជើងប្រទេសម៉ុងហ្គោលី។ ភ្លាមៗ ក៏ស្រាប់តែមានខ្យល់បោកបក់មកខ្លាំងធ្វើឱ្យនាងទប់លំនឹងលែងបានហើយក៏ធ្លាក់ចូលក្នុងជ្រលងភ្នំបាត់បង់ជីវិតតែម្ដង។ បច្ចុប្បន្ន ប្រទេសកូរ៉េខាងត្បូងកំពុងធ្វើការយ៉ាងជិតដិតជាមួយអាជ្ញាធរប្រទេសម៉ុងហ្គលី ដើម្បីស៊ើបអង្កេតលម្អិតលើករណីគ្រោះថ្នាក់នេះ។
គួរឱ្យដឹងថា ភ្នំភ្លើង Uran Togoo ជាភ្នំភ្លើងមួយមានកម្ពស់ប្រមាណ ១៦៨០ ម៉ែត្រពីនីវ៉ូទឹកសមុទ្រ។ ភ្នំភ្លើងនេះដែរ មានមាត់ភ្នំទំហំប្រមាណ ៥០០ ទៅ ៦០០ ម៉ែត្រ និង ជម្រៅ ៥០ ទៅ ៦០ ម៉ែត្រ។ ភ្នំភ្លើងអសកម្មនេះ មានប្រព័ន្ធអេកូឡូស៊ីដ៏ទាក់ទាញ ពោរពេញដោយធម្មជាតិស្រស់បំព្រងខៀវខ្ចី អមដោយបឹងតូចៗ ធ្វើឱ្យវាក្លាយជាទីតាំងទេសចរណ៍ដ៏ទាក់ទាញមួយនៅប្រទេសម៉ុងហ្គោលី៕
