ភ្នំ Fuji ដែលជាទីតាំងទេសចរណ៍ដ៏ទាក់ទាញបំផុតមួយក្នុងប្រទេសជប៉ុន មានទេសភាពស្រស់ស្អាត កំពូលភ្នំមើលពីចម្ងាយឃើញព្រិលធ្លាក់សក្បុលនោះ ថ្មីៗនេះកំពុងធ្វើឱ្យអាជ្ញាធរក៏ដូចជាពលរដ្ឋក្នុងប្រទេសព្រួយបារម្ភ ព្រោះតែឈានមកដល់រដូវនេះហើយ ភ្នំនេះនៅមិនទាន់ឃើញមានព្រិលធ្លាក់នៅឡើយ ដោយនេះចាត់ទុកជារឿងដ៏កម្របំផុតមួយមិនធ្លាប់មានក្នុងរយៈពេលជាង ១០០ ឆ្នាំមកនេះ។
យ៉ាងណាមិញ កាលពីថ្ងៃទី ៣១ ខែតុលា ឆ្នាំ ២០២៤ កន្លងទៅ តាមការព្យាករណ៍ពីអ្នកជំនាញអាកាសធាតុក្នុងតំបន់ម្នាក់បាននិយាយថា ភ្នំ Fuji រំពឹងថានឹងត្រឡប់មកមានព្រិលធ្លាក់សក្បុសឡើងវិញនៅក្នុងសប្ដាហ៍នេះ។ តាមការរៀបរាប់ពីអ្នកជំនាញអាកាសធាតុបាននិយាយថា៖ «នៅថ្ងៃទី ០៦ ខែវិច្ឆិកា ឆ្នាំ ២០២៤ ខាងមុខ អាចនឹងមានព្រិលធ្លាក់មួយចំនួនឡើងវិញនៅលើភ្នំ Fuji។ ខ្យល់ត្រជាក់នឹងធ្លាក់ចុះមកហើយកែប្រែពីភ្លៀងទៅជាព្រិលនៅជិតកំពូលភ្នំ។ អាកាសធាតុនឹងចាប់ផ្ដើមស្រឡះបណ្ដើរៗ ហើយព្រិលអាចនឹងមើលឃើញលើភ្នំនៅព្រឹកថ្ងៃទី ០៧ ខែវិច្ឆិកា ខាងមុខ»។
គួរបញ្ជាក់ដែរថា តាមធម្មតាព្រិលនឹងចាប់ផ្តើមធ្លាក់នៅលើកំពូលភ្នំ Fuji តាំងតែពីថ្ងៃទី ២ ខែតុលាមកម្ល៉េះ តែមកទល់ពេលនេះគេមិនទាន់ឃើញមានព្រិលធ្លាក់នៅលើកំពូលភ្នំនៅឡើយទេ ដែលនេះចាត់ទុកថាជាការធ្លាក់ព្រិលដ៏យឺតបំផុតរបស់ភ្នំ Fuji ដោយហេតុការណ៍នេះធ្លាប់កើតឡើងដំបូងតាំងពី ១៣០ ឆ្នាំមុន ចំណែកលើកទីពីរគឺនៅក្នុងឆ្នាំ ១៩៥៥ និង លើកទីបីនៅក្នុងឆ្នាំ ២០១៦៕
