លោក Choi Jung Woo តារាសម្ដែងជើងចាស់កូរ៉េដ៏ល្បីដែលធ្លាប់បង្ហាញវត្តមានក្នុងរឿងភាគកូរ៉េល្បីៗជាច្រើនដូចជារឿង «City Hunter» «Doctor Stranger» និង រឿង «The Legend of the Blue Sea» ជាដើមនោះ បានទទួលមរណភាពហើយក្នុងវ័យ ៦៨ ឆ្នាំ។
ដំណឹងដ៏តក់ស្លុតមួយនេះដែរត្រូវបានប្រកាសដោយទីភ្នាក់ងាររបស់លោកផ្ទាល់ ដោយក្នុងសារប្រកាស ទីភ្នាក់ងារ Bless ENT បានសរសេររៀបរាប់ថា៖«តារាសម្ដែង Choi Jung Woo បានទទួលមរណភាពហើយ។ ចំពោះមូលហេតុលម្អិតនៃការចាកចេញរបស់តារាសម្ដែងរូបនេះនៅមិនទាន់បានទម្លាយនៅឡើយទេ»។
គួរឱ្យដឹងថា តារាសម្ដែង Choi Jung Woo បានកើតក្នុងឆ្នាំ ១៩៥៧ ដោយរូបលោកបានចាប់ផ្ដើមអាជីពជាតារាសម្ដែងដំបូងក្នុងឆ្នាំ ១៩៧៥។ លោកបានបង្ហាញវត្តមានក្នុងខ្សែភាពយន្ត និង រឿងភាគកូរ៉េល្បីៗជាច្រើន ដោយអ្នកស្នេហាវិស័យ K-Drama ប្រាកដជាស្គាល់រូបលោកច្បាស់៕
ប្រភព៖ Koreaboo