ជាកំពូលតារាក្បាច់គុនបុរាណចិនដ៏ល្បីល្បាញម្នាក់ ដឺលធ្លាប់តែបង្ហាញភាពរឹងមាំស្វាហាប់ឱ្យទស្សនិកជនអ្នកគាំទ្របានឃើញ តែធាតុពិតទៅ តារាសម្ដែងជើងចាស់ Jet Li (លី លានជា) ក៏មានចំណុចទន់ខ្សោយដែលខ្លួនឯងកំពុងប្រឈមមុខផងដែរ។
តាមការទម្លាយ លោក លី លានជា លោកបានរៀបរាប់ថា ការទទួលបានចំណាប់អារម្មណ៍ និង សម្ពាធពីសាធារណជន បានធ្វើឱ្យលោកបាត់បង់ភាពជាខ្លួនឯងពិតប្រាកដ ជាពិសេសនៅពេលលោកត្រូវហោមព័ទ្ធដោយអ្នកគាំទ្រ។
ជុំវិញនឹងជំងឺអូទីហ្សឹម បើទោះជាលោកមិននិយាយលម្អិតថាចំណុចអ្វីដែលធ្វើឱ្យលោកជឿថាខ្លួនឯងកើតមានជំងឺអូទីហ្សឹមកម្រិតស្រាល តែលោកចាប់អារម្មណ៍ខ្លួនឯងកើតមានជំងឺខ្លាចសង្គម (social anxiety) ក្រោយមានអារម្មណ៍រំជួលចិត្តខណៈពេលធ្វើការចុះហត្ថលេខា។ លោកបានរៀបរាប់ថា៖ <<យើងចុះហត្ថលេខាឱ្យមនុស្ស ៥០ នាក់ដំបូង តែមនុស្ស ១០ នាក់បន្ទាប់មិនបានទទួលហត្ថលេខាគឺមិនសប្បាយចិត្តឡើយ>>។
លោក Jet Li ក៏បានទម្លាយទៀតថា ធ្វើជាអត្តពលិកគឺងាយស្រួលជាងធ្វើជាតារាសម្ដែង។ មុនក្លាយជាតារាសម្ដែង លោកគឺជាជើងឯកកីឡា wushu ឈ្នះពានរង្វាន់ជាតិ ៥ ដង មុនចូលនិវត្តន៍ក្នុងឆ្នាំ ១៩៧៩។ លោកបាននិយាយថា ពេលធ្វើជាអត្តពលិក យើងគិតតែធ្វើឱ្យល្អពេលប្រកួត ហើយអាចរស់នៅជីវិតជាខ្លួនឯងទៀត បើតារាសម្ដែងវិញគឺត្រូវពាក់ម៉ាស់សូម្បីតែមិននៅកន្លែងថតក៏ដោយ។
លោកបន្ថែមទៀតថា លោកគឺពិតជាមិនចូលចិត្តការសម្ភាសជាមួយអ្នកកាសែត និង ទៅកន្លែងដែលមានមនុស្សកកកុញឡើយ។ <<និយាយរួមទៅ បើកន្លែងណាកកកុញ ហើយមិនមែនទៅថថតរឿង គឺខ្ញុំមិនទៅឡើយ។ ដូច្នេះ ខ្ញុំគិតថាជំងឺអូទីហ្សឹមរបស់ខ្ញុំគឺមិនធម្មតាទេ>> លោក Jet Li ទម្លាយ។
យ៉ាងណាមិញ បច្ចុប្បន្ននេះ Jet Li គឺមិនសូវមានអារម្មណ៍ភ័យខ្លាចពេលនៅទីសាធារណៈដូចមុន ហើយថ្មីៗនេះលោកក៏អាចរីករាយអង្គុយផឹកកាហ្វេជាមួយកូនស្រីនៅហាងកាហ្វេនៅសៀងហៃផងដែរ។
ជាមួយគ្នានោះដែរ លោកក៏អរគុណដល់សកម្មភាពសប្បុរសធម៌របស់លោកដែលជួយលោកឱ្យគេចចេញណីការផ្ដាច់ខ្លួនពីគេ និងជួយឱ្យលោកអាចធ្វើការទំនាក់ទំនងជាមួយអ្នកដទៃដែរ៕
ប្រភព៖ 8days
