ថ្មីៗនេះ តារាសម្ដែងហុងកុង Kristal Tin បានចេញមកទម្លាយលើបណ្ដាញសង្គមរបស់នាងថា នាងបានរកឃើញកើតមានជំងឺមហារីកសួតក្នុងដំណាក់កាលដំបូង ដែលដំណឹងមួយនេះបានធ្វើឱ្យអ្នកគាំទ្ររបស់នាងជាច្រើនមានការភ្ញាក់ផ្អើល និង បង្ហាញការបារម្ភជាខ្លាំង។
តាមរយៈការបង្ហោះកាលពីថ្ងៃទី ០៣ ខែធ្នូ ឆ្នាំ ២០២៤ កន្លងទៅនេះដែរ អតីតតារាសម្ដែងប្រចាំទូរទស្សន៍ TVB វ័យ ៤៧ ឆ្នាំរូបនេះបានបង្ហាញរូបភាពដែលនាងកំពុងដេកលើគ្រែពេទ្រដោយមានក្រុមគ្រូពេទ្យនៅពិនិត្យជុំវិញខ្លូនត្រៀមដើម្បីចូលបន្ទប់វះកាត់។ តាមការសរសេររៀបរាប់ Kristal បានឱ្យដឹងថា នេះជាលើកដំបូងហើយដែលនាងទទួលការវះកាត់ ហើយជំងឺមហារីកនេះរកឃើញអំឡុងពេលនាងទៅពិនិត្យសុខភាពធម្មតា។
អ្នកនាង Kristal បានឱ្យដឹងទៀតថា ដោយសារតែមហារីកស្ថិតក្នុងដំណាក់កាលដំបូង ក្រុមគ្រូពេទ្យគឺគ្រាន់តែតម្រូវឱ្យធ្វើការវះកាត់យកមហារីកនោះចេញប៉ុណ្ណោះ។ យ៉ាងណាមិញ មិនមានការបញ្ជាក់ឡើយថា ក្រោយវះកាត់រួចតារាស្រីរូបនេះត្រូវឆ្លងកាត់ការបាញ់គីមីឬក៏អត់នោះឡើយ។
ដើម្បីកុំឱ្យអ្នកគាំទ្រព្រួយបារម្ភខ្លាំង តារាសម្ដែងស្រី Kristal Tin ក៏បានបញ្ជាក់ដែរថារូបនាងគឺមានស្ថានភាពសុខភាពល្អធម្មតាទេ។ ជាមួយគ្នានោះដែរ មហាជនជាច្រើនក៏បាននាំគ្នាបញ្ចេញមតិជូនពរឱ្យនាងឆាប់ជាសះស្បើយផងដែរ៕
