កាលពីថ្មីៗកន្លងទៅ តារាចម្រៀង Justin Bieber បានធ្វើការបង្ហាញខ្លួននៅក្រុងញ៉ូយ៉ក ជាមួយនឹងម៉ូដសក់ថ្មី ពាក់អាវ Hoodie ពណ៌លឿងស្រស់។ យ៉ាងណាមិញ បើទោះជា Justin កាត់សក់ផ្លាស់ប្តូរស្ទីលថ្មីក៏ពិតមែន ប៉ុន្តែរូបរាងថ្មីរបស់លោកឥលូវនេះបែរជាធ្វើឱ្យមហាជន ក៏ដូចជាអ្នកគាំទ្ររបស់លោកជាច្រើនបង្ហាញការព្រួយបារម្ភទៅវិញ។
ជាក់ស្ដែង ដូចដែលរូបភាពថតបានបង្ហាញឱ្យឃើញម្ចាស់បទ «Yummy» រូបនេះ មើលទៅចាស់មុខបាក់ ចងចិញ្ចើមជាប់ដូចពោរពេញដោយទុក្ខកង្វល់ខ្លាំង។ សភាពរបស់លោកនេះដែរបានធ្វើឱ្យអ្នកលេងបណ្ដាញសង្គម X ខ្លះលាន់មាត់ថា មើលលោកលែងស្គាល់ថែមទៀតផង។
សភាពរបស់ Justin Bieber ពេលនេះ បានធ្វើឱ្យអ្នកគាំទ្រសង្ស័យថាលោកកំពុងមានបញ្ហាក្នុងជីវិតអាពាហ៍ពិពាហ៍ បើទោះជាលោកចេញមុខមកបញ្ជាក់ថាចំណងប្ដីប្រពន្ធរបស់លោកនៅល្អដូចដើមក៏ដោយ។
គួររំឭកថា កាលពីដើមខែមករាកន្លងទៅ ចចាមអារ៉ាមថា Justin Bieber និង ភរិយា Hailey Bieber ជួបរឿងប៉ះទង្គិចគ្នា ក្រោយឃើញ Justin ចុច unfollow ប្រពន្ធលើ IG។ យ៉ាងណាមិញ ក្រោយមកលោកបានចុច follow វិញ ដោយចោទថាគណនីរបស់លោកមានគេលួចចូល។ ទោះជាយ៉ាងណាក៏ដោយ ក៏នៅមានអ្នកគាំទ្រលោកជាច្រើនទៀតបានចេញមកលើកទឹកចិត្ត ផ្ញើក្ដីស្រឡាញ់ និង ជូនពរឱ្យលោកជួបតែរឿងល្អៗក្នុងជីវិត៕
ប្រភព៖ Newsweek
