ដំណឹងដ៏តក់ស្លុតនៃមរណភាពភ្លាមៗរបស់តារាសម្ដែងចិនដ៏ល្បី Yu Menglong កំពុងតែធ្វើឱ្យមហាជនជាច្រើនសោកស្ដាយខ្លាំង និង នៅតែមិនទាន់អាចទទួលយកបាននៅឡើយ។ តាមការបញ្ជាក់ផ្លូវការពីអ្នកនាំពាក្យ studio របស់លោក បានឱ្យដឹងថា តារាប្រុស Yu Menglong បានបាត់បង់ជីវិតនៅថ្ងៃទី ១១ ខែកញ្ញា ឆ្នាំ ២០២៥ ដោយសារការធ្លាក់ពីលើអគារ ហើយក្រោយការស៊ើបអង្កេត ប៉ូលិសមិនរកឃើញថាករណីស្លាប់របស់តារាសម្ដែងប្រុសរូបនេះជាករណីឃាតកម្មនោះឡើយ។
យ៉ាងណាមិញ ក្រោយមកថ្មីៗនេះក៏មានការផ្ទុះចចាមអារ៉ាមយ៉ាងក្ដៅគគុកលើបណ្ដាញសង្គម Weibo ក្នុងប្រទេសចិន ដោយទម្លាយថា ការស្លាប់ភ្លាមៗរបស់តារាសម្ដែងប្រុសវ័យ ៣៧ ឆ្នាំរូបនេះ មិនមែនជាករណីឧប្បត្តិហេតុចៃដន្យឡើយ តែមានការពាក់ព័ន្ធនឹងមិត្តភក្តិរបស់លោក។
តាមចចាមអារ៉ាមនោះបានរៀបរាប់ថា មិត្តភក្តិរបស់ Yu Menglong ដែលជាអ្នកស្រឡាញ់ភេទដូចគ្នា គឺសុទ្ធតែជាកូនអ្នកមានខ្លាំង ហើយនៅថ្ងៃជួបគ្នានោះពួកគេបានរៀបគម្រោងធ្វើឱ្យ Menglong ស្រវឹង និង ចាប់រំលោភបូករហូត ៦ នាក់ជាថ្នូរនឹងនាឡិកា Rolex ចំនួន ២ គ្រឿង។ ក្រោយដឹងខ្លួនថាត្រូវមិត្តភក្តិប្រព្រឹត្តទង្វើស្មោគគ្រោកលើខ្លួន Menglong ក៏សម្រេចលោតពីលើអគារតែម្ដង។
ចចាមអារ៉ាមនេះដែរ កំពុងតែក្ដៅគគុកខ្លាំងមិនថាតែនៅក្នុងប្រទេសចិន ឬ ប្រទេសកម្ពុជានោះទេ ដោយមានមហាជនអ្នកគាំទ្រជាច្រើនក៏បានបង្ហាញការប្រតិកម្មមិនពេញចិត្ត ដោយខ្លះលើកឡើងថា ព័ត៌មានគ្មានប្រភពច្បាស់លាស់បែបនេះ វាពិតជាប៉ះពាល់ដល់កិត្តិយសជនរងគ្រោះជាខ្លាំង៕
