អ្នកគាំទ្រកាន់តែសង្ស័យថា ចំណងប្ដីប្រពន្ធតារាស្រី Myolie Wu រង្គោះរង្គើ ខណៈមិនឃើញនាងចេញមុខប្រតិកម្មជុំវិញរឿងធ្លាយរូបថតប្ដីឱបថើបស្រីក្នុងក្លឹប

ថ្មីៗនេះ អ្នកជំនួញ Philip Lee ដែលត្រូវជាស្វាមីរបស់តារាសម្ដែងស្រី Myolie Wu កំពុងពាក់ព័ន្ធរុំខ្លួននឹងរឿងអាស្រូវផិតក្បត់ប្រពន្ធ ក្រោយកម្រងរូបភាពជាច្រើនរបស់លោកឱបថើបមនុស្សស្រីជាច្រើននៅក្នុងក្លឹបត្រូវបានបែកធ្លាចែកចាយពាសពេញបណ្ដាញសង្គមក្នុងប្រទេសចិន។

ក្រោយរងការសង្ស័យពីសំណាក់មហាជនថាលោកលួចផិតក្បត់ប្រពន្ធ មុនទុកឱ្យសៅហ្មងយូរ លោក Philip Lee ក៏បានចេញមុខមកធ្វើការបដិសេធភ្លាមៗផងដែរ ដោយលោកលើកឡើងថាចំណងអាពាហ៍ពិពាហ៍របស់លោកគឺនៅតែមានក្ដីសុខដូចដើម ហើយការឱបថើបមនុស្សស្រីពេលនោះគឺគ្រាន់តែជាការបង្ហាញភាពស្និទ្ធស្នាលប៉ុណ្ណោះ។ តាមរយៈការបង្ហោះបកស្រាយ លោក Philip បានរៀបរាប់ថា៖ «ភ្ញាក់ឡើង ថ្ងៃនេះអាកាសធាតុល្អណាស់ ឱ្យខ្ញុំឱបក្រុមគ្រួសារខ្ញុំ មិត្តភក្តិ និង មិត្តរួមការងារខ្ញុំ។ ខ្ញុំចង់ផ្ដល់ការឱបដ៏កក់ក្ដៅមួយដោយមិនគិតពីភេទអ្វីឡើយដូចដែលអ្វីខ្ញុំបានធ្វើនៅពិធីជប់លៀងខួបកំណើតខ្ញុំក្នុងក្លឹបកាលពីពេលថ្មីៗកន្លងទៅនេះ។ បើសិនខ្ញុំរៀបចំធ្វើខួបម្ដងទៀត ខ្ញុំនឹងនៅតែបង្ហាញភាពស្និទ្ធស្នាលបែបនោះដដែល។ គ្រប់គ្នាដឹងថា ខ្ញុំជាមនុស្សចូលចិត្តឱបគេ និង ឱ្យគេឱប ហើយខ្ញុំគិតថាអ្នកដែលចែកចាយព័ត៌មានមិនពិតពីខ្ញុំ និង គ្រួសារខ្ញុំគឺសុទ្ធជាអ្នកដែលត្រូវការឱ្យគេឱបខ្លាំងបំផុតនៅពេលនេះ។ គឺមានតែប៉ុណ្ណឹងទេ សុខសប្បាយអ្នកទាំងអស់គ្នា»។

ការឆ្លើយតបរបស់លោក Philip នេះដែរបានធ្វើឱ្យមានផ្ទុះវែកញែកយ៉ាងខ្លាំងពីសំណាក់អ្នកលេងបណ្ដាញសង្គមនៅក្នុងប្រទេសចិន។ មនុស្សជាច្រើនគឺមិនជឿការបកស្រាយរបស់លោកឡើយ ដោយពួកគេគិតថាអ្នកជំនួញរូបនេះបាននិយាយយកលេសឱ្យរឿងអាស្រូវលោកឱបថើបស្រីសាបរលាបទៅវិញ។

ដោយឡែក ងាកទៅតារាសម្ដែងស្រី Myolie Wu វិញ បើទោះជាស្វាមីចេញមុខមកបដិសេធជាសាធារណៈបែបនេះក្ដី តែនាងគឺមិនមានឃើញបង្ហាញប្រតិកម្មជុំវិញរឿងនេះ ឬក៏និយាយការពារប្ដីអ្វីឡើយទាំងដែលប្ដីកំពុងរងការរិះគន់ដូចទឹកបាក់ទំនប់បែបនេះ។ ភាពស្ងៀមស្ងាត់ដ៏ចម្លែកពីសំណាក់តារាសម្ដែងស្រីរូបនេះហើយ កាន់តែធ្វើឱ្យមហាជនជាច្រើនជឿជាក់ថា ចំណងអាពាហ៍ពិពាហ៍រវាងនាង និង ស្វាមីគឺកំពុងតែមានបញ្ហាពិតប្រាកដមែន៕

ប្រភព៖ Kenh14